admin
Johas Moyo
ABE-LIVESTOCK Production Department bacebisa abalimi ukuthi baqalise ukulungiselela isikhathi sebusika ngokusikela izifuyo zabo utshani babugcine ukuze zingasweli ukudla njengoba kukhanya ukuthi kulendlala lonyaka.
UMnumzana Addmore Chikowa onguLivestock Production Officer esabelweni seMatabeleland North ukhuthaze abalimi ukuthi balungiselele ukudla kwenkomo kwebusika ngoba lonyaka utshani abukhulanga kakhulu.
“Izifuyo kazidingelwe ukudla kusesemasinya, lokhu lingakwenza ngokuzisikela utshani libugcine kuhle. Utshani kumele bugcinwe buseluhlaza ngoba buyabe bulokudla konke okweneleyo emzimbeni wesifuyo.
“Yakhani indawo ezivalekileyo ezingatshisiyo lapho elizafaka khona utshani elibusikayo njalo lokhu kumele likwenze ngokuphangisa bungakapheli,” kutsho uMnu Chikowa.
Uqhubekele phambili njalo uMnu Chikowa ekhuthaza abalimi ukuthi basebenze njengamaqembu ukuze benelise ukusika utshani obunengi njalo kuba lula ukuthi bancedisane lasekubuthwaleni.
“Abalimi kabasebenze bengamaqembu, badinge izimota kanye lemitshina yokusika utshani. Lonyaka akulatshani egangeni kungakho abalimi bangahamba duzane lemigwaqweni bancedisane basike utshani obukhona buseluhlaza bayebugcinela inkomo.
“Ikhansili kayilayo imitshina yokuquma utshani eduzane lemigwaqweni kukanti yikho lapho obukhula khona kakhulu,” kutsho uMnu Chikowa.
UMnu Chikowa wengezelele wathi njengoba lomumbu ungenzanga kuhle emasimini amahlanga lawo kaganyulwe eseseluhlaza agcinelwe inkomo.
Uphethe ngokuthi abalimi kumele babone ukuthi inkomo zabo ziyathola amanzi eneleyo njengoba umzimba wenkomo ulesisindo esingaba yi 90% samanzi njalo ukudla okudliwa zinkomo kumele kuncediswe ngamanzi ukuthi kugayeke njalo kusebenze kuhle emzimbeni wazo.
Online Reporter