admin
Nkosilathi Sibanda
KUBE yisililo kuzakhamuzi zakuWadi 11 eNsuza kulandela ukufa kwezithandani ezimbili ngemva kokulala lembawula ubusuku bonke.
Abahlali bakulindawo loba bengelaqiniso lakho, bacabangela ukuba ngoLwesine lweviki edluleyo, uMhangelwa Nyoni lomkakhe uSiboneni Moyo bajumeka balibala ukukhipha imbawula yamalahle akade beyotha, okwenza bahotsha intuthu ubusuku bonke.
Iphephandaba likazuku lithole loludaba kuzakhamuzi ezithile ezifakaze ukuba izithandani zombili zatholakala zifile emzini wazo ngelanga elilandelayo.
Ekuxhumaneni lesikhulumi samapholisa esabelweni seMatabeland North u-Inspector Glory Banda kuvele ukuba kusadingisiswa isizatho sokufa, loba nje omakhelwane bechaza ukuthi imbangela kwaba yikuphefumula umoya ongahlanzekanga.
U-Insp Banda utshele intatheli ukuba basalinde ucwaningo oluvela kubodokotela abahlole izidumbu esibhedlela se-United Bulawayo Hospitals (UBH).
“Bobabili batholakale befile emzini wabo. Okwamanje angeke sichaze imbangela njengoba sisalinde umbiko wabodokotela abasesibhedlela se-United Bulawayo Hospitals,” kutsho isikhulumi samapholisa.
Intatheli ixhumane lokhansila wakuWadi 11 uPatterson Zororo obike ukuba balokukholwa okujulileyo ukuthi imbangela yokufa yikuhotsha intuthu yamalahle.
“Sicabangela ukuthi omakhelwane bethu balala imbawula ivutha amalahle, okwenza baphefumula intuthu ubusuku bonke. Silusizi njengesigaba ukulahlekelwa yizakhamuzi kanje.”
Ukufa kwalaba bobabili kuze ngesikhathi amapholisa labezempilakahle beqonqosela ukuthi abantu beqaphele ukubasa imbawula endaweni ezivalekileyo ngalesi isikhathi somqando.
Online Reporter