admin
Ethel Ncube
UMPHATHINTAMBO obona ngokwenzakala esabelweni seMatabeleland North uKhomuredi Richard Moyo usegqugquzele uzulu kuleli ukuba ayehlaba amajekiseni okuvikela iCovid-19.
UKhmrd Moyo wethule linkuthazo ngempelaviki esesikolo seMahlothovu Secondary eMguza lapho athe abantu bangalaleli imbiko engaqondanga esabalaliswa ngabanye abantu echothoza ukuthi abantu bahlatshwe amajekiseni eCovid-19.
Ekhuluma lentatheli uKhmrd Moyo uthe kubalulekile ukuthi abantu balandele imithetho yokuvikela ukumemetheka kwegcikwane le-coronavirus.
“Umkhuhlane we-Covid-19 uyabulala, kawukhethi muntu ukuthi ngubani, ulemali kumbe kawulayo kungakho ngikhuthaza izakhamizi ukuba zihambe zonke ziyethola amajekiseni emakilinika aseduzane labo.
“Nxa umuntu ethe waba lesivakatshi esivela phandle kwelizwe kasigcine singaphumi ngaphandle komuzi okwamalanga angu-14. Umhlobo weCovid-19 osukhona ovelela e-India uyabulala awudlali njalo ulamandla.
“Kawuguli isikhathi eside, uyenelisa ukuba layo ilanga elilodwa ngelanga elilandelayo sizwe kuthiwa kawusekho.
Kasiqapheleni bazali sihlale sigqoke izifonyo njalo sigeze izandla zethu ngesepa kokuphela nxa sihlala sivulelane izikhala singaminyani,” kubika uKhmrd Moyo.
Uqhubekele phambili echaza ukuba umuntu wonke uyakhuthazwa ukuba ayehlaba ijekiseni yokuvikela iCovid-19.
“Amajekiseni la uhlaba kabili uyahamba uyehlaba eyokuqala uhlale amalanga athize ubuyele uyehlaba eyesibili.
Nginje lami ijekiseni yakhona ngayihlatshwa kodwa ukuhlatshwa lokhu akutsho ukuba kalisangihlaseli igcikwane le-coronavirus kungakho lingahlaba liqhubeke lilandela izixwayiso zokuvimba ukumemetheka kweCovid-19.
“Ngithanda ukulikhuthaza lonke ukuba sukumani liyehlatshwa ijekiseni le ngoba ungabanjwa ngumkhuhlane lo ube usuyidinga ngeke kukusize lutho,” kuphetha uKhmrd Moyo.
Online Reporter