YiNtatheli kaMthunywa
KULEZITHANDANI zePlumtree ezenze into yamehlo nanko zihlanganyele zathumba idlalicatsha lendoda, zaligwaza zabuye zalifaka ibilebile esithweni sangasese emangcwabeni.
Abasolwa uSikhumbuzo Ncube oleminyaka engu-45 yokuzalwa ongumbalisi esikolo seMatiwaza Primary kunye lonkosikazi wakhe uPriscilla Ncube oleminyaka engu-42 bagwetshwe ngumantshi wePlumtree uDambudzo Malunga ngoLwesibili mhlaka 10 Lwezi ngenxa yesenzo sabo esihlasimulisa umzimba.
Kuzwakale ukuthi izithandani lezi zahuga umamangala oleminyaka engu-21, owayethandana loSikhumbuzo, bamthumba baya laye emangcwabeni eMathendele, lapho abafika bamhlukuluza khona ngesihluku.
Kubikwa mhlaka 28 Mfumfu ngehola lika 6 ntambama, uPriscilla wahlangana lomamangala, eme lomkakhe.
UPriscilla wahlasela umamangala owazama ukubaleka kodwa ngokusweleka kwenhlanhla wamgwenxa wawa wabanjwa nguSikhumbuzo.
Ababili laba bahle bambopha izandla lenyawo andubana bangene laye iganga.
Sebesegangeni, uPriscilla wakhipha ingqamu, waquma umamangala inwele wabuye wamgwaza kanye ekhanda andubana amethusele ngokumbulala.
Inkundla izwe ukuthi uPriscilla wabuye wamhlikihlela ibilebile elihlweni lesandleni sokudla, wasika impahla zakhe.
Kubikwa uSikhumbuzo ngaleso sikhathi wayesekhanyise ngomakhalekhukhwini.
Kucala lesibili, uPriscilla walaya umamangala ukuthi avule inyawo emethusela ngokumgwaza isitho sangasese andubana amfake ibilebile esithweni.
Indaba le yabikwa emapholiseni ePlumtree okwenza ababili laba babotshwa. Umamangala walaywa ukuthi ayekwelatshwa esibhedlela sePlumtree.
Ababili laba bagwetshwe ukuthi bazapika umnyaka owodwa ngokutshaya kuthi ngokuhlukuluza ngokocansi bagwetshwe iminyaka engu-15 njalo izigwebo zizahamba ndawonye.
Umtshutshisi kulelicala bekunguNkosazana Sheila Nyathi.
