YiNtatheli kaMthunywa
KULESISEBENZI senkampani eqinisekisa izindleko zomngcwabo esilahlekelwe ngumsebenzi kulandela insolo zokuthandana lomfazi owendileyo.
UFrank Tika umangalele uTakudzwa Masamba enkundleni yenduna uMakoni, emsola ngokuthandana lomkakhe uPatience kanye lokuba nguye obangele ukubhidlika komtshado wabo weminyaka elitshumi.
UTika, obefuna ukuthi uMasamba amhlawule ngenkomo ezintathu, utshele inkundla ukuthi bobabili bahlangana esibhedlela seRusape General Hospital lapho uPatience ayefundela khona umsebenzi wokunakekela izidumbu.
“Ngisebuhlungwini ngenxa yalokho okwenziwe nguPatience. Ngumkami weminyaka elitshumi njalo silomntwana oyedwa. Ngakhupha inkomo lemali yamalobolo i-US$2 500. Ngamsiza ukuthi athole indawo yokufundela umsebenzi esibhedlela ukuze anakekele izidumbu.
“Yikho lapho ahlangana khona loMasamba basebeqalisa ukuthandana. Ngathola ukuthi bayathandana ngokubona imifanekiso ababeyithumelana kumakhalekhukhwini kaPatience.
“Abazali bakaPatience bangibizela emzini wabo bangibamba ngamandla ukuthi ngivume ukwehlukana lomkami ngokwamukela imali yesahlukaniso. Bathi ngangizalimaza indodakazi yabo ngoba ngangiyisola ngokungathembeki.
“UMasamba wathi esizwa ukuthi sengikwazi ngobudlelwano babo wangifonela esithi ubengakwazi ukuthi uPatience ngumfazi otshadileyo.
“Ngamtshela ukuthi ayekele ukuthandana lomkami, kodwa okwangimangalisayo wathi ngangingeke ngimenze lutho. UMasamba waxotshwa emsebenzini ngenxa yaloludaba,” kutsho uTika.
UMasamba uvumile ukuthi wayethandana loPatience kodwa wathi wayemtshele ukuthi wayengatshadanga. Uthe ingxabano le yamenza walahlekelwa ngumsebenzi, njalo uTika wayemethusela.
“Angizange ngithandane lomfazi owendileyo. Ngahlangana loPatience ngesikhathi sisiyalanda izidumbu zabantu ababengamakhasimende enkampani yethu esibhedlela seRusape General Hospital. Yena wayefundela umsebenzi wokunakekela izidumbu.
“Ngambuza ngesimo sakhe somtshado wangitshela ukuthi kendanga.
“Ngamtshela ukuthi mina ngitshadile kodwa ngiyamthanda. UTika kalabufakazi bokuthi ngangithandana lomkakhe. UPatience wangitshela ukuthi wayesenike uTika imali yesahlukaniso.
“UTika ulokhu engisongela ngezindlela ezitshiyeneyo, okugoqela ukuthi izitho zami zangasese zizadliwa ngumuhlwa.
“Ngilahlekelwe ngumsebenzi ngenxa yaloludaba. Khathesi sengisesaba ukuthi angangilimaza,” kutsho uMasamba.
UPatience uthe wayesehlukane loTika kabili kodwa yena wayengafuni ukwamukela ukuthi umtshado wabo usuphelile.
“UTika uqamba amanga esithi ngingumkakhe. Wayengumkami kodwa wayengihlukuluza engitshaya.
“Lokhu kwenza ukuthi ngimnike imali yesahlukaniso kabili. Wayethuka labazali bami. UFrank wayevame ukuya ezinyangeni njalo wathatha izigqoko zami zangaphansi. Wayebuya labanye abesifazane emzini wethu. Wayengisongela ngokungibulala.
“Ngathi sengisehlukana loTika, wangitshela ukuthi wayezangenza ngophe impilo yami yonke. Wake wangibamba ngisendleleni ngisedolobheni wangithathela umakhalekhukhwini wami.
“Amapholisa angicebisa ukuthi ngenze isehlukaniso esisemthethweni loTika. Ngamnika imali yesahlukaniso abazali bethu bekhona kanye lomeli wethu,” kutsho uPatience.
Ngemva kokulalela inhlangothi zombili, induna uMakoni ikhulule uMasamba ezinsolweni zokuphinga, esithi uPatience wamqila ngokungamtsheli iqiniso ngesimo sakhe somtshado.
Induna le yeluleke uTika ukuthi alandele uyise kaPatience ukuze abuyiselwe ingxenye yamalobolo ayeyikhuphile, ukuziphatha kukaPatience akwamukeleki.
