Sidumisile Mabena
Vusumuzi Dube eMaphisa
Inkulungwane zezizalwane zeZimbabwe zitshaye indiva isimo somkhathi esingasihle zaya kumkhosi wokunanza ilanga likazibuse weminyaka engamatshumi amane lasithupha owenzelwe enkundleni yeMaphisa, esigabeni seMatobo, esabelweni seMatabeleland South.
Lumkhosi oqhutshwa ngaphansi kwendikimba ethi; “Zim@46: Ukubambana kanye lentuthuko sisiya kuVision 2030,” uhanjelwe ngabantu abavela endaweni ezehlukeneyo esabelweni lesi kunye laselizweni lonke jikelele beveza ukuzigqaja ngelizwe labo.
Kukhangelelwe ukuthi kube labantu abedlula i-50 000 kumkhosi lo.
Umcimbi walonyaka welizwe lonke uphawuleka kakhulu esabelweni seMatabeleland South, njengoba lesi isabelo siphethe umkhosi omkhulu wokuthakazelela uzibuse ngemva kokuphatheka kunhlelo ezehlukeneyo eziguqule iMaphisa kanye lendawo eziyizungezileyo ngesikhathi kulungiselelwa umcimbi lo.
UMongameli Mnangagwa ukhangelelwe ukwethula inkulumo eqakathekileyo.
Kuthi ngemva kwemini kukhangelelwe ukuthi kudibane amaqembu amabili kanobhutshuzwayo iHighlanders leScottland kunkezo kaZibuse.
Online Reporter