adminNDOHUBA kanyi kwedu kuBuKalanga
Kwandinomuka mangwanana ndin’wa tiyi
Inankaka nkobvu wembudzi newen’ombe
Kwayinohaka kuti noyin’wisa nemanongo kene nenyimo
Nenyemba kene nemakavu, nemagwadla kene newhakwa.
Tizuwa tisakabiga tili muntuzi unotonholela wenkwakwa
Bana belikuna wabo ntuzi wen’umba bedla bakanyalala.
Ndohuba kanyi kwedu kuBuKalanga
Kwatinodla hadza jena, lezembgwe nelemapfunde
Kwawunohala kuti noliseba nedelele kene nenyovi
Newhatjulu, nemowa kene netjonyongwane
Tilikomba takahangana sebana ben’ha
Tidanila nebanopinda kuzila
Kana ndiwo nlenje wedu.
Ndohuba kanyi kwedu kuBuKalanga
Kwatinodla ntakula, netjimoni nenhopi
Kana ndoyida kwazo yabhikwa nempale inozipilila
Tidlisa nemahwe, nentubi kene nenkaka mbisi
Tizuwa tiseka ngeno tikapula tisaka biga
Kana dla kozipisa ndebo
Ndokumbula kanyi kwedu kuBuKalanga
Kwatinon’wa mahewu tikan’wa nkumbi
Kwatinon’wa ntumbgwi wemapudzi tikan’wa mputo
Tilala mitumbu ipenya sabontabentabe
Kana ndikanyi kwedu
Kozipa!
Ndohuba kanyi kwedu kuBuKalanga
Kwatinobhata nyeza nebulimbo tikateya whali nemjibila
Kwatinobhata mahonja tikateya whobe kumabilila
Tilala tadla nyama mimoyo yakahalabvuka
TibaKalanga tozwida nezwodliwa zwedu
Kene ndokuswikigwa nani?
Kana ndiko kanyi kwedu.
Ndohuba kanyi kwedu kuBuKalanga
Kwatinodla nyama yen’ombe mumizano tikadla yembudzi
Kwatisingabhuzwe kuti iwe unkololo wani, wakokiwa nani?
Kwatinoziba kuti dla kohhadzisa bukamu kana gugaswa
Ngono tibva tiziba kuti dla akuzotongomusa bakafa
Todla nebataya tikadla nemadeluka
Kana iswi tibaKalanga kakale tozwida
Atizotongo diyiwa halawula!
Ndohuba kanyi kwedu kuBuKalanga!
Online Reporter