admin
YiNtatheli kaMthunywa
USOMABHIZIMUSI omkhulu esabelweni seMatabeleland North uReeds Dube usekhuthaze amaqembu aphatheka kwezemidlalo yokuzithokozisa lamasiko ukuthi aqinele ukubumba imisebenzi ezathokozisa uzulu elakho njalo ukubaphilisa kanye lokwakha isizwe.
UDube obengumhlonitshwa ukhulume lokhu ngesikhathi evula umkhosi weShangano Arts and Culture Festival edolobheni leHwange kumaviki amabili edluleyo ngokusemthethweni.
IShangano Arts and Culture Festival ngumkhosi osuleminyaka elitshumi uqhutshwa njalo yiwo wodwa umcimbi wezemidlalo lamasiko osuqhutshwe kuzigaba zonke zesabelo seMatabeleland North.
“Inkuthazo engiyipha amaqembu akumsebenzi wezokuthokozisa yikuthi kumele ancedise ekuvuseni imisebenzi kanye lokwakha umphakathi ukuze isizwe sibelengqubekela phambili. Labo abenza imidlalo abaphaphame, baqale ukuthatha lumsebenzi njengebhizimusi.
“Kuminyaka elitshumi kuqhutshwa umcimbi weShangano festival, kuyathabisa ukubika ukuba sekube lenguquko kundlela abantu asebezwisisa ngayo umsebenzi lo. Ngaphandle kokugcina amasiko lokuzithokozisa, imkhosi enjengale iyasiza ukuvumbulula ithalenta elicatshileyo,’’ kutsho uDube.
UDube ubengomunye wabosomabhizimusi lamankampani asekele ukuqhutshwa kweShangano Arts and Culture Festival ngoba kubikwe ukuthi abaqoqi bayo bebethwele nzima ukuhlanganisa izinto njengoba bekuswelakele imali.
Ekhuluma lephephandaba likazulu umqondisi weShangano Arts and Culture Festival uPetros Ndlovu uthe bekulukhuni ukuqoqa umkhosi walonyaka kodwa babonga uDube labanye abaphathisileyo ukuthi umkhosi uphumelele.
“IShangano Arts and Culture Festival ingene umnyaka wetshumi lokhe wasungulwa esabelweni seMatabeleland North. Usukhulile lumkhosi, okuyikhona okusinikeza injabulo. Lonyaka sikhethe idolobho leHwange ngoba yikho lapho esaqala khona. Umkhosi uqhube kakuhle loba bekunzima ukuthi sithole imali yokwenza okuthile. Sidonse amabhanti kwaze kwalunga, nanko sesiwenzile umkhosi weShangano owetshumi. Ama-artists ethu atshengisele ukuzimisela, sibonga bonke abasincedisileyo,” kutsho uNdlovu.
Amaqembu ezomculo lemigido aphatheke kulumkhosi lonyaka abalisa iPezhuba Pachena, Shantana Band, Shadreck Kativhu, Kasi Generals, Vulindlela Dance Group lezinye.
Online Reporter