admin
Ethel Ncube
KULOMAKOROKOZA weButterfields eLower Gweru osile ngokulambisa njalo ulokhe ilalisiwe esibhedlela seGweru kulandela ukuhlahlelwa ekhanda kunye lebusweni ngehloka ngoba kucatshe igolide.
Kubikwa uMicheal Ncube oleminyaka engu-33 uhlaselwe ngehloka waphindwa wabhaxabulwa ngabanye omakorokoza ababalisa uAndile Mpofu, Vusa Mpofu, Nhoro Bhebhe loTimothy okungasatholakalanga isibongo sakhe.
Kuzwakale ukuba abetheswacala laba batshaye uNcube bamtshiya esesimeni esibi andubana badliwe ngumswenya.
Kubikwa uNcube owasala ethe daca phansi waze wabonwa ngomunye owayezihambela owahle wayabikela amapholisa.
Kubikwa uNcube wathwalelwa esibhedlela seGweru lapho alaliswe khona njalo usesimweni esibi.
Ekhuluma loMthunywa omunye wezakhamizi zakule indawo uMnumzana Joel Dube uveze ukuba abasolwa laba kumele badingwe.
“Abenza lelicala kumele bajeziswe kungani bengazange bayobikela amapholisa nxa babecabangela ukuthi nguye otshontshe igolide kulokuthi bamhlahlele ngehloka ekhanda lebusweni.
“Ukulimaza umuntu akulula kodwa bona bakwenza into encane nje. Sifisa babanjwe bajeziswe,” kutsho uMnu Dube.
Intatheli ixhumane lesikhulumi samapholisa eMidlands uInspector Emanuel Mahoko ovumileyo ukuba udaba olunjalo lufikile kibo.
“Samukele umbiko wendoda ehlahlelwe ngehloka kabili ekhanda sinxusa uzulu ukuthi nxa ekhona ongabe elolwazi ngabasolwa laba azise amapholisa aseduze laye,” kuphetha uInsp Mahoko.
Online Reporter