admin
Johas Moyo
KUSIGA esitshiye abomdeni kanye lezakhamizi zeGwizo Mine eKwekwe zidanile kulo jaha ofe kabuhlungu nanko phela utshiswe ngamagetsi ephansi emgodini wasala sokulilahle njalo kucatshangelwa ukuthi abanye bakhe bangabe belesandla ekufeni kwakhe.
Kubikwa ngeviki ephelileyo uFred Ncube ubephansi emgodini esemba igolide labanye bakhe. Kuvele ukuba lapho akade egebha khona bekulamanzi acine ehlangana lamagetsi okubangele ukuthi ahle atshe.
UMthunywa uxhumane lo Silobukhosi Dube olilunga lomdeni yena oveze ukudabuka okukhulu ngokulahlekelwa kwabo ngumfana osasemncane njalo obelusizo kakhulu emulini.
“UFred ubesesemncane kakhulu ukuthi afe kabuhlungu kangaka. Ubelusizo kakhulu emulini njalo silahlekelwe okwamagama. Kubuhlungu ukuzwa sokuthiwa umuntu kasekho yena engazange agule.
“Silokhe singakakwamukeli ukuthi kasekho ngoba besisakhangele ukuqhubeka laye empilweni. Kunzima kithi njengemuli, asikuzwisisi ukuthi ufe njani ngoba ubehlala engena emgodini labangane bakhe. Kungani bengamsizanga? Ngibuhlungu ngomzawani uhambe esasemcane kakhulu”, kutsho uNksn Dube.
UMthunywa uxhumane njalo lo Albert Moyo ongumakhelwane njalo engumngane yena oveze ukudabuka lokwethuka okukhulu ngokufa komngane wakhe engabavalelisanga njalo okuyinto engajwayelekanga ukuthi ugetsi uhlangane lamanzi phansi emgodini.
“Ngididekile ngoba umngane wami ubelenhliziyo enhle ekwazi ukuphila kuhle labantu okwenza lami ngicabangele ukuthi bambulele ngoba belomhawu laye ngoba amagetsi la ahlala esetshenziswa. Amanzi avele ngaphi, ufe kabuhlungu esemnyama ngokutshiswa ngamagetsi,” kutsho uMnu Moyo.
UMthunywa uxhumane njalo lesikhulumi samapholisa uInsp Goko yena obike ukuthi ubengakawuzwa umbiko lo njengoba eqalise umsebenzi kuyonale iviki wathembisa ukuthi bazadinga kabanzi ngodaba lolo.
Online Reporter