UKUDUBUKA okwenzakale endaweni okugcinwa impahla edubukayo eBuchwa Iron Mining Company (BIMCO) kudilize izindlu lamabhizimusi okwedlula i-80 eRedcliff njalo kwabangela ukufa komuntu oyedwa.
Isehlakalo lesi esenzakale ngeSonto ngehola lesithathu ekuseni njalo sitshiye izakhamizi zithithibele.
Kubikwa imiduli yezakhiwo idilikile, amafasitela afa kwathi uphahla lwezinye izindlu lwawela phansi.
Ukudubuka lokhu kubuye kwabangela ukufa kukanogada otholakale izandla zibotshiwe okwenza kube lemibuzo ngokufa kwakhe.
Isizatho zokudubuka lokhu silokhu sisadingisiswa loba imbiko iveza ukuthi kungabe kube lomzamo wokutshontsha impahla le.
Izakhamizi zithi zavuswa ebuthongweni ngumsindo wokudubuka, njalo abanye besabela impilo zabo.
“Bengilele, angazi ukuthi yinto bani edubukileyo eyenze ukuthi indlu yonke inyikinyeke,” kutsho esinye isakhamuzi.
“Engakucabanga kuqala ngabantwabami,” kutsho esinye isakhamuzi.
USodolobho weRedcliff uAlderman Vincent Shangwa Masiiwa uthe umonakalo obangelwe yikudubuka lokhu mkhulu kakhulu.
“Yisehlakalo esibuhlungu esisehleleyo. Ukudubuka okubekhona, bekulamandla amakhulu njalo umonakalo wakhona mkhulu,” kutsho yena.
UMphathintambo obona ngokwenzakala eMidlands uOwen Ncube, uqinisekise ukulahleka kwempilo yomuntu kanye lokonakala kwezindlu lamabhizimusi.
“Yisehlakalo esibuhlungu lesi esenzakale ekuseni ngabo-3 ekuseni. Kulezindlu kunye lamabhizimusi okudilikileyo, njalo okudanisayo yikuthi kulomuntu oyedwa olahlekelwe yimpilo,” kutsho yena.
Kubikwa ukuthi kule indawo kutholakale isigelo esikhulu sokusika amabhawudo (bolt cutter) kanye lezinye izikhali okucatshangelwa ukuthi zisetshenziswe ukuvula ngamandla umnyango wendawo le.
Isikhulumi sekhansili yeRedcliff uMnumzana Michael Magoronga uqinisekise ngesehlakalo esithi inhlolisiso yakuqala iveza ukuthi ukudubuka lokhu kungabe kubangelwe yikuzama ukutshontsha.
“Indaba le isisezandleni zeJoint Operations Command (JOC). Uphenyo seluqalisile ukuze kutholakale okwenzakeleyo okubangele ukudubuka kanye lokufa kukanogada,” kutsho uMnu Magoronga.
UMnu Magoronga uthe indawo yokugcina amabhomba le, isendaweni elentaba, kodwa ukudubuka kubangele umonakalo lasemalokitshini amanengi.
Kusaziso esikhutshwe emphakathini, ikhansili yeRedcliff ithe ukudubuka lokhu kwenzakale ebusuku njalo kwalimaza izakhiwo emalokitshini atshiyeneyo.
Iziphathamandla zisaqhubeka ngophenyo ukuze kutholakale imbangela yokudubuka, lokuthi kuhlolwe ubukhulu bomonakalo.
