admin
Joel Ndlovu
I-BEETROOT yisilimo esilenzuzo enhle njalo esilula ukulima okungenza umlimi azitshayele imali yakhe enhle emkambo.
I-beetroot yisilimo esilazakhi zomzimba ezinengi okwenza sakhe umzimba.
Ekhuluma lentatheli kaMthunywa uNkosikazi Agnes Ndebele oyingcitshi kwezokulima esabelweni seMatabeleland North uthe i-beetroot ingalinywa ngesikhathi sebusika kusukela ngoNhlolanja kusiya kuNtulikazi.
“I-beetroot ayihlanyelwa nje isikhathi sonke, ilesikhathi sayo lapho ekhula khona kuhle njalo abalimi kumele bakunanzelele lokhu bayilime ngoNhlolanja kusiya kuNtulikazi.
“Yenza kuhle emhlabathini ongafakwanga mquba ukuze amajodo ayo akhule kuhle. Isilimo lesi silakho ukukhula kundawo ezitshiyeneyo njalo ezilomkhathi otshiyeneyo,” kutsho uNkkz Ndebele.
Uqhubekele phambili esithi kulula ukunakekela isilimo lesi njalo amagodi akhona akumelanga atshone kakhulu.
“Umlimi nxa ehlanyela lesi isilimo kuqakathekile ukuthi agebhe amagodi alingana lempande zaso. Kuqakathekile njalo ukufuqa inhlabathi ivale impande. Umlimi kumele akhumbule ukuthelela kuhle isilimo sakhe eqeda kusihlanyela kodwa angatheleli okwedlulisileyo.
Uphethe ngokuthi abalimi kumele bakuqakathekise ukukhipha ukhula lapho abahlanyele khona isilimo sabo.
“Umlimi kumele ahlakule asuse ukhula ngaso sonke isikhathi aphinde abone ukuthi uyathelela isilimo sakhe okuzwayo ikakhulu ngesikhathi sokoma ngoba lokhu kungenza isilimo singakhuli kuhle.”
Online Reporter