admin
Nkosilathi Sibanda
IQEMBU leHighlanders lithole inkulungwane zamadola eMelika zivela kuMarvelous Nakamba loTeenage Hadebe.
Imali ivela kumaqembu athenga abadlali laba abalolongwa yiHighlanders besacathula kunguqu. UHadebe, osedlalela iYeni Malatayspor kwele-Turkey, kubikwa ukusuka kwakhe kwaletha imali angange $4 000.
Inzuzo kaNakamba kubikwa yileyo eyamaqembu abalisa iClub Brugge yase Belgium le-Aston Villa eNgilandi. UNakamba ugcwalise isikhwama seBosso ngemali eyedlula i$4 000.
Kube yinhlanhla enkulu kuleliqembu ngesikhathi lisadalala ukugcina abadlali lezisebenzi ngenxa yokumiswa kwemidlalo.
IBosso, njengawo wonke amaqembu enguqu, isiphila ngokucela. Abadlali baphiwa impuphu, isitshebo lemali yokuthi benelise ukuphila kusalindwe ukuqala kwemidlalo.
Ngeviki ephelileyo, iqembu lithole usizo oluvela kumphurofethi uEmmanuel Mutumwa webandla leJohane WeMasowe weChishanu.
Abadlali lenkokheli zeqembu zibonakele zithe gwaqa zidinga usindiso enkonzweni kaMutumwa. Kule inkonzo iqembu leBosso lithenjiswe okunengi okubalisa impumelelo lokuthengelwa kwabo kaputeni bayo izimota.
Online Reporter