admin
Nkosilathi Sibanda
IHIGHLANDERS leNgezi Platinum, amaqembu omdlalo kanobhutshuzwayo kuligi ephezulu adibana ngoMgqibelo, kudingwa elizaqethula elinye kumdlalo we-final enkundleni yeBarbourfields.
Akubizwa ozwayo eMagumeni ikakhulu kubalandeli beHighlanders asebebone iqembu labo lidonsa imidlalo elitshumi lambili lihuba ngokunqoba kuphela. Kube zindaba ezinhle njalo kubalandeli laba ukuba lumdlalo ube seBarbourfields.
Izimbamgodi zeNgezi zingena umango wakoNtuthu zilokhu zilesilonda esibhibhidlayo sokwehluleka ukuyinqoba kumidlalo yeligi yeCastle Lager ekaMatshobana.
Mhla ziqala ukuhlangana ngoNtulikazi, iBosso yahlohla elilodwa, layo iNgezi elilodwa. Ziphinde zathobelana eBarbourfields mhlaka 13 kulinyanga, iHighlanders yayibamba njalo nge 1-1.
Pho kuyozala nkomoni ngoMgqibelo, zisithi 30 kuLwezi?
Umqeqetshi weNgezi Platinum uRodwell Dhlakama ubikele uMthunywa ukuthi uyiwomele iHighlanders njalo kasoze avume ukuthi imyangise.
“Siyaphindela njalo eBarbourfields okutsho ukubana silungisile amaphutha ethu. Kumele ngiyinqobe iHighlanders khathesi. Ngakho njengoba sesihlangana kunkezo yeChibuku, ngizabopha ziqine. Sengibonile ukuthi iqine ngaphi iHighlanders, okutsho ukuthi sengilalo icebo lokuphuma nginqobile eBarbourfields. Ngiyayihlonipha lithimu kodwa angeke ngivume ukubanjwa yithimu eyodwa imidlalo ilandelana,” kutsho uDhlakama.
Umqeqetshi weHighlanders uHendriek de Jongh uthe akulanto angayitsho ngomdlalo lo ngaphandle kokuthi uzabumba iqembu njengalokho ajwayele ukukwenza.
“Ngilungiselele ngaphelela ukuthi sidlalele ukufinyelela ama-finals alinkezo. Angila okunengi engingakuphawula ngomdlalo wethu leNgezi
Platinum. Inhloso yami yikuqhubeka ngokunqoba,” ngumqeqetshi wezikaMagebhula lo.
Kusenjalo, ezanqoba ngoMgqibelo ithola ithuba lokuyakhankasa kumqhudelwano we-Confederation of Africa Football (Caf) Confederations Cup.
Phezulu kwalokhu, intshantshu izadibana lentshantshu yeCastle Lager ngoZibandlela kunkezo ebizwa ngokuthi yiCastle Challenge.
Online Reporter