admin
Ethel Ncube
ABALIMI bakhuthazwa ukuba balime imiqwente ngoba ilenzuzo enhle kubalimi.
Umlimisi weAgritex uMnumzana Sinini Sibanda uveze ukuba abalimi sebengaqala ukulungiselela ukulima imiqwente ngoba ilinywa kusukela ngenyanga kaMpandula kusiya kuMfumfu.
Ekhuluma loMthunywa uMnu Sibanda uveze ukuba abalimi abaqale ukulungisa imibheda yabo yokumilisa usaba lwemiqwente.
“Asiqaleni ukumilisa usaba ngoba isikhathi yiso lesi. Nxa ufuna ukulima i-acre kumele uhlanyele usaba olungaba yi-2kg ukuze kwenele indawo yonke.
“Imiqwente kayifuni kuswela amanzi kungakho umlimi kumele abone ukuthi uyathelela.
“Imiqwente ukuze ivuthwe ithatha amalanga angu-90 kusiya ku-100 njalo usungaqala ukuwasuphuna uthengisa,” kutsho uMnu Sibanda.
Uqhubekele phambili njalo ekhuthaza abalimi ukuba isilimo lesi sifuna ukunakekelwa.
“Akulamsebenzi onzima nxa ulime imiqwente okwakho kuphela yikubona ukuthi akulakhula njalo akulazibungu ezihlaselayo.
Umlimi angabona kulezibungu kumele asuphune isilimo esisodwa ahambe laso nxa esesiyathenga umuthi ukuze afike atshengise abesitolo.
Lokhu kuyaphathisa ukuthi athengiselwe umuthi oqondileyo wezibungu lezo.
“Balimi isikhathi sekhefu sesisondela, abantu bayayidinga imiqwente kungakho nxa lingalima khathesi lilakho ukuzitshayela imali ngesikhathi sekhefu,” kuphetha uMnu Sibanda.
Online Reporter