admin
Buhlebenkosi Gaule
IQULA leGreen World selikhuthaze abalimi ukuba bakhuthalele ukulima izihlahlakazana ezelaphayo njalo eziqinisa imizimba ngoba zingumuthi ongaphathisa abantu kanye lezifuyo.
UNkosazana Shylet Manyere onguConsultant eGreen World ukhulume lokhu kumkhosi weHlanganani/Sanganai kuviki ephelileyo emagumeni eZimbabwe International Trade Fair koBulawayo.
UNkszn Manyere ukhuthaze abalimi ukuthi balime izihlahlakazana lezi ezingumuthi emizimbeni yabantu njalo ezilakho ukunceda lezifuyo zabo.
“I-Green World yinkampani epheka imithi lokudla okuncedisa imizimba ngezihlahlakazana ezitshiyeneyo ezinengi njalo lezo zihlahlakazana zitholakala kwelakithi.
“Kungakho abalimi bangazinikela ukuthi balime izihlahlakazana lezi ngoba ziyelapha lezifuyo zabo abazifuyileyo,” kutsho uNkszn Manyere.
Uqhubekele phambili uNkszn Manyere esithi izihlahlakazana abalimi abangazilima zigoqela ichena elinceda kumikhuhlane etshiyeneyo ehlasela ijwabu lomuntu njalo lesi sihlahlakazana asidingi amanzi amanengi ukuba sikhule.
“Abalimi balakho ukulima izihlahlakazana ezibalisa i-sweet basil, i-comen grass, i-mint kanye le-rosemary.
Izihlahlakazana lezi zinganathwa ngemva kokubiliswa amahlamvu akhona ziyahlamba ingcekeza yonke esemzimbeni womuntu,” kutsho uNkszn Manyere.
“I-sweet basil iyitshantshu ekuhlambululeni igazi njalo yenza ligijime emzimbeni ngoba nxa igazi lingahambi kuhle emzimbeni kuyadala imikhuhlane etshiyeneyo emzimbeni womuntu,” kutsho uNkszn Manyere.
UNkszn Manyere uthe ukulima izihlahlakazana kulakho ukubatholisa inzuzo enhle ngoba belakho ukuzithengisela labo abazifunayo zingakahlanganiswa leminye imithi.
Online Reporter