admin
NguEmmanuel Ndlovu
LIVUTHA amalangabi omlilo wephane ngempela iqembu le-iTribe eliqhunsa umdumo we-Afrosoul khonalapha koNtuthu nanko phela selincindezele idlalade elitsha elilokhe lisacolisiswa ngohlonzi oluphezulu elizweni le-Austria.Leliqembu elisacathulayo njalo elikhanya lilomfutho wokusa kwelinye izinga lumculo, lihwatshe idlalade elilengoma ezingu-12 ngeviki edluleyo.
UButshilo Nleya ongumqondisi walo uthe lelidlalade ngelakuqala ukuncindezelwa liqembu kukanti likhangelelwe ukungena emphakathini maduze nje.
“Siqede ukulincindezela ngeSonto kuyonale iviki njalo sesilihambise elizweni le-Austria ukuthi liyelungiswa ngohlonzi oluphezulu andubana silingenise ebantwini.
“Lokhu sikwenza ngoba sifuna ukuthi lanxa siphakululela abantu ukudla kwethu kube kungokohlonzi oluphezulu hatshi imboza. Sifuna umdumo walo uthuthukise indima eyaqalwa ngabahlabeleli abafana loSalif Keita, Ringo Madlingozi, Vusa Mkhaya kanye lo-Oliver Mtukudzi,” kutsho uNleya.
Ubuye wathi idlalade leli alikanikezwa ibizo eliqondileyo kodwa lilengoma ezingu-12.
Ingoma ezikuleli idlalade kubikwa ziphekwe ngendimi ezehlukeneyo ezigoqela isiShona, Ndebele, Swahili kanye leSikhiwa.
Kukanti lihlanganise umdumo we-Afropop, Afrosoul kanye le-Afrojazz.
Iqembu le-iTribe labunjwa ngomnyaka ka2014 njalo lilamalunga amane agoqela uThandi Dlana, Zet Moyo, Xmile kanye loNleya.
Selaqhunsa kundawo zokuchitha isizungu ezimbalwa ezikoBulawayo kanye lakumikhosi egoqela iNtwasa Arts Festival le-Ibumba International Arts Festival.
Online Reporter