Online Reporter
Yintatheli kaMthunywa
AMAPHOLISA asebike ukuba kufe umuntu oyedwa kulandela ukuphithezela okube khona abantu befuna ukungena enkundleni yeNational Sports, eHarare ngoMvulo kusihlwa ngesikhathi somdlalo wamaWarriors leDemocratic Republic of Congo, owokukhankasela ukudlala ku-Africa Cup of Nations (AFCON) ka-2027.
Isehlakalo lesi senzakale phandle kwenkundla, andubana kuqale umdlalo njalo amapholisa athe asachwayisisa ngodaba lolu.
Amapholisa athe ingozi le yenzakale ku-Gate Two ngehola lesithupha ntambama.
Kumbiko okhutshwe mhlaka 28 Mpandula ebusuku, isikhulumi samapholisa uCommissioner Paul Nyathi uthe ukuchwayisisa sekuqalisile ukuze kutholakale okwenzakeleyo.
“IZimbabwe Republic Police iyakuqinisekisa ukuthi ichwayisisa ngesehlakalo esibuhlungu esihlanganisa imota yamapholisa esetshenziswa kwezokulondoloza ukuthula lomuntu obehamba ngenyawo eNational Sports Stadium, lapho okufe umuntu oyedwa kuGate Two ngemva kwehola lika 6 ntambama ekuqaleni komdlalo webhola phakathi kweZimbabwe leDemocratic Republic of Congo,” kutsho uComm Nyathi.
“IZimbabwe Republic Police iqinisekisa kuzulu ukuthi kuzakuba lophenyo olugcweleyo ukuze kutholakale okuyikho okwenzakeleyo,” kutsho uComm Nyathi.
Uthe bazakhipha umbiko ogcweleyo nxa sebeqede ukudingisisa.
