Online Reporter
MAPURISA ekuChipinge akasunga mumwe murume svondo rapera mushure mekuona bindu raive rakadyarwa mbanje apo vaiferefeta nyaya yekubiwa kwepombi dzemadiridziro pane rimwe purazi reko, iyo yakanga isina chokuita nembanje dzakazowanikwa idzi.
Mutauriri wemapurisa munyika, Commissioner Paul Nyathi, vanotsinhira kusungwa kwaCephas Chirume.
“NeChina, 30 Chikunguru 2026, mapurisa ekuChipinge akasunga Cephas Chirume (27) nokuda kwemhosva yekurima mbanje zvisiri pamutemo panzvimbo inogara vashandi vepaFarm Nine, kuMiddle Sabi.
Kusungwa kwake kwakatevera kubiwa kwepombi dzekudiridzisa papurazi iri. Mapurisa akaenda kunzvimbo iyi. Panguva yekutsvaga kwavaiita mubindu remunhu aifungidzirwa, vakabva vaita mahweke nembanje yaive yakadyarwa mubindu iri,” vanodaro.
Commissioner Nyathi vanoyambira voruzhinji kuti vasiyane nenyaya dzine chokuita nezvinodhaka, vachisimbisisa kuti mapurisa akagadzirira zvizere kurwisana nenyaya dzerudzi urwu. — The Manica Post
