Online Reporter
Tendai Gukutikwa
MAKONDOMU anosvika 15 800 akagoverwa svondo rapera chete kuvatyairi vemagonyeti, vanoita mabhizimusi ekuenda kunze kwenyika vachinohodha zvinhu zvakasiyana-siyana, vanoita basa rekutengesa muviri nevamwe vafambi paForbes Border Post neveZimbabwe National Family Planning Council (ZNFPC).
Aisanganisira evarume neevakadzi uye chirongwa ichi chakaitwa pasi pesangano reInternational Organisation for Migration (IOM).
VaDaniel Maromo vanova mukushi wemashoko uye vachiona zvakare nezvekushambadza kuZNFPC kuManicaland, vanoti chirongwa ichi chimwe chenzira dzavanoshandisa mukudzivirira kutapurirana zvirwere zvepabonde.
Vanosimbisisa kuti huwandu uhu ndehwemakondomu akagoverwa chete kwete vanhu vakataurwa navo paiitwa chirongwa ichi.
“Svondo rapera chete, takagovera makondomu anosvika 15 000 evarume ne800 evakadzi paForbes Border Post. Zvisinei, izvi hazvireve kuti takapa vanhu 15 800 nekuti vamwe vaitora mapeketi emakondomu anodarika rimwe chete,” vanodaro.
Chirongwa ichi chakaitwa panzvimbo mbiri — panotengeswa mafuta ezvifambiso pedyo nemuganhu wenyika nepamuganhu wacho — izvo zvakabatsira zvikwata zveutano kuti vakwanise kusvika kuvanhu vakawanda.
“Zvisinei, hatina kuzokwanisa kubatsira vose vaida rubatsiro urwu nekuda kwenguva yaive shoma. Ichi chiratidzo chekudiwa kuri kuitwa zvinhu zvine chekuita nekusimudzira utano hwesikarudzi kumiganhu yenyika,” vanodaro VaMaromo.
Vanoti kuwanikwa kwemakondomu kunharaunda dziri kumuganhu wenyika kwakakosha nekuti anobatsira mukudzivirira pamuviri pasina kurongeka pamwe chete nekutapurirana zvirwere zvepabonde.
