Online Reporter
Munyori weKwayedza
MURUME wekwaSeke ane makore 32 ekuberekwa akatongerwa kugara mujeri kwemwedzi mitanhatu izere zvichitevera kubatwa kwaakaitwa nemhosva yekubaya munhu nebanga mushure mekunge arambidzwa kupinda muchimbuzi icho chainge chiri kunzi hachishandi.
Botso rechimbuzi iri rakasiya mumhan’ari, Samuel Veremu (46), wekwaSeke aine maronda pachigunwe apo akabaiwa kamwe-chete nebanga naTapiwa Nyengeri.
Mutongi wedare reChitungwiza Magistrates’ Court, VaBatsirai Madzinga, vakapa Nyengeri chirango chekugara mujeri kwemwedzi mitanhatu izere.
Pakutanga, vainge vamupa chirango chekugara mujeri kwemwedzi gumi asi vakazomubvisira mwedzi mina nechitsidzo chekuti haafaniri kupara mhosva yerudzi urwu makore mashanu asati adarika.
Muchuchisi Shamiso Charmaine Mwapangira vakaudza dare kuti nomusi wa26 Kubvumbi munguva dzemanheru, mumhan’ari ainge ari kubasa kwake kuUnit L Shopping Centre apo Veremu akapinda muchimbudzi achibva amutaurira kuti chainge chisiri kushanda.
Izvi zvakamutsa gakava iro rakazoguma nekubaiwa kwaVeremu nebanga pachigunwe.
Veremu akakuvara zvikuru achibva aenda kunorapwa uye magwaro ekwachiremba akabudiswa mudare seumbowo.
