Online Reporter
Dalyn Chigwizura
MURUME ane makore 56 okuberekwa wekuBulawayo akamiswa mudare reko achipomerwa mhosva yekubata chibharo hanzvadzi yake yemakore 44 uyo anove murwere wepfungwa.
Musungwa uyu, uyo anogara kuMpopoma uye zita rake risingakwanise kuburitswa senzira yekuchengetedza mumhan’ari, akamiswa pamberi pemutongi wedare reWestern Commonage Courts, VaPasipanodya Maturure, avo vanove regional magistrate, achipomerwa mhosva yekubata chibharo.
Akaendeswa mutorongo kusvika musi wa24 Kurume 24 apo achadzoka kudare kuti nyaya yake ienderere mberi nekutongwa.
Muchuchisi, Muzvare Melissa Dube, vakaudza dare kuti muna 2025, musungwa anonzi akabhinya hanzvadzi yake, iyo yaanogara nayo, kakawanda.
Dare rakanzwa kuti nyaya iyi yakazobuda pachena muna Zvita apo mumhan’ari akataurira aimbove mudzimai wemusungwa nezvekubatwa kwake chibharo.
Aimbova mudzimai wemusungwa uyu akabva akazivisawo mukoma wemusungwa muna Kurume gore rino.
Izvi zvakabva zvaita kuti murume uyu asungwe.
Mumhan’ari akazoendeswa kuchipatara kunoongororwa nanachiremba uye gwaro rezvakabuda richabuditswa mudare seumbowo.
