Online Reporter
Kingstone Mapupu
MURUME ane makore 53 okuberekwa anove murindi pane imwe kambani kuShurugwi akarwiswa nemakororo 15 aive akapakata mabhemba, matemo nemapfumo avo vakamubira mari yake uye ndokuzopisa mudhudhudhu wake.
Anonzi akasangana nemakororo aya apo aiva mumugwagwa panzvimbo yemabhizimisi yeMambava kuShurugwi nemusi wa10 Kukadzi nenguva dza7pm achityaira mudhudhudhu vachibva vamumisa.
“Brighton Zirare anova murindi weimwe kambani aityaira mudhudhudhu werudzi rweATA achienda kuLadville Main Site, apo akasvika panzvimbo ine chisango akabva amiswa nevarume gumi nevashanu vaiva vakapata mabhemba, mapfumo, matemo nemasimbi. Vakabva vamumanikidza kuburuka pamudhudhudhu wake,” vanodaro Inspector Emannuel Mahoko vanova mutauriri wemapurisa kuMidlands.
Vanoti varume ava vakatanga kurova Zirare nezvombo izvi vachimutema nemabhemba vachibva vamusecha ndokumutorera US$260, chitupa nenhare yemhando yeSamsung ndokuzopisa mudhudhudhu wake.
“Zirare anoti pakubirwa uku, akakwanisa kuziva vanhu vane mazita ekutanga anoti Amos, Kelvin naKundi. Murume uyu akakuvara zvikuru muviri wese, kusanganisira musoro nekumusana, nekuda kwekutemwa nemabhemba nekurohwa uku,” vanodaro Insp Mahoko.
Nyaya iyi yakazomhan’arwa kuShurugwi ndokutanga kuferefetwa uye mapurisa akaona mudhudhudhu uyu watsva wose.
“Tiri kukumbira kuruzhinji vane ruzivo nekuda kwemakororo aya kuti vazivise mapurisa ari padyo navo kuitira kuti vakapara mhosva iyi vakwanise kusungwa. Tinokurudzirawo veruzhinji kuti vasatakure mari yakawanda pakufamba,” vanodaro Insp Mahoko.
