Online Reporter
Rutendo Nyeve
NHENGO dzemuviri wemurume akaurayiwa negarwe padhamu reMpopoma, kuMatobo nemusi wa1 Chivabvu dzakazoonekwa dziri mudumbu rengwena iyi mushure mekunge yavhiiwa kwapera mavhiki anodarika matatu.
Izvi zvakaziviswa neveZimbabwe Parks and Wildlife Management Authority (ZimParks).
Nhengo dzemuviri wemurume uyu dzakazoonekwa nemusi wa23 Chivabvu mushure mekunge veZimParks vapfura ndokuvhiya garwe iri.
Mushure mekunge murume uyu arwiswa negarwe iri, vanhu vemunharaunda iyi vakabatana nemapurisa uye veZimParks nevamwe kutsvaga mutumbi wake asi havana kuuwana kusvikira pakazobatwa garwe iri.
Mukushi wemashoko kuZimParks, Luckmore Safuli, anotsinhira nyaya iyi.
“Garwe iri rakapfurwa uye ndokuvhiiwa nemusi wa23 Chivabvu. Paraivhiiwa, nhengo dzemuviri dzinove dzemurume uyu dzakabva dzawanikwa dziri mudumbu maro,” vanodaro VaSafuli.
Vanoyambira veruzhinji kuti vangwarire kana vachinge vari panzvimbo dzine mvura dzinozivikanwa kuti dzine makarwe.
“Veruzhinji vanoyambirwa kuti vasatuhwinhe, kuraura hove kana kuchera mvura panzvimbo dzisina kuchengetedzeka, kunyanya mangwanani-ngwanani nemanheru apo makarwe anenge achinyanya kufamba,” vanodaro.
Zvakadai, ZimParks yakatumira mashoko enyaradzo kumhuri, shamwari nevamwe vaiwadzana nemurume akurayiwa negarwe uyu.
Inoti yakazvipira kusimbaradza kuchengetedzwa kweveruzhinji pamwechete nemhuka uye nekuona kuti pane hugaro hwakanaka.
Mpopoma Dam ragara richizivikanwa kuti rine makarwe akawanda uye vagari vemunzvimbo iyi vanokurudzirwa kuti vangwarire zvakanyanya kana vachinge vari padyo naro.
