admin
Nkosilathi Sibanda
IZimbabwe isiphumile kumidlalo yeAfrican Union Sports Council Region Five Youth Games ngenxa yokuvela kwegcikwane le-Omicron kanye lokuvinjelwa ukuhamba.
Amaqembu abafana lamantombazana abaleminyaka engaphansi kwe-17 yokuzalwa, bekufanele ancintisane lamanye kumqhudelwano lo obuhlelwe edolobheni leMaseru, eLesotho, kuleli iviki.
Kumbiko okhutshwe yinhlanganiso ye-Cosafa, imidlalo le ayisoze iqhubekele phambili.
“Ukuvela kwe-Omicron kudale ukuthi kube lezinguquko ezinengi enhlelweni zemiqhudelwano yebhola labafana lamantombazana e-Region 5 Games Maseru 2020.
“Imiqhudelwano isivele yahlaselwa njalo yikuba iZimbabwe, iSeychelles leComoros sezibike ukuba azisoze zincintise,” kutsho umbiko lo.
“Kutsho ukuthi yomibili imiqhudelwano isifinyeziwe. Abafana bazaqala mhlaka 17 kuMpalakazi kuthi amantombazana azadlala mhlaka 2 kusiya ku-6 Mpakalazi.”
Kusenjalo, ukuqhamuka kwezinqumo ezintsha zokuvikela iCovid-19 sekumise lomdlalo obuzadibanisa abadlali beHighlanders abadla ubhedu.
Umdlalo lo ubuqoqwe nguAlexander “The Cool Ruler” Maseko, usekelwe yinkampani yakhe iTalent Focus Sports Management.
Ebika ngalokhu, uMaseko uthe ulusizi.
“Ngilokudana ukwazisa ngokwedluliselwa phambili komdlalo obuzakuba ngumcimbi wokuhlangana kwabadlali. Lokhu kudalwe yizinqumo ezintsha eziphawulwe eSouth Africa laseZimbabwe.
Online Reporter