admin
Ophezulu Stinta
Imibhalo engalotshwanga
SISAQHUBEKA sinanzelela ukuqakatheka kwenganekwane kanye lezimpawu zenganekwane ezithile. Kulombuzo omkhulu odingisisa ukuthi vele inganekwane zimayelana lani, inganekwane zona zingani, ngumbuzo oqukethe okunengi. Inganekwane ziqukethe okunengi ngempilo. Zikhuluma ngomuntu elusana, esekhulile, elijaha/ eyintombi, izigaba umuntu adlula kuzo ezifana lomhawu, umona, ubuthakathi, ubuvila kanye lenzondo.
Inganekwane lezi singazehlukanisa-ke ngezigaba ezintathu ezigoqela izigaba ezimayelana labantu, leziphathelane lezinyamazana, ezinye njalo kuyilezo ezixubeneyo.
Izigaba lezi zenza kube lula njalo kuzwisiseke ukulandela inganekwane lezi, siphuma lezifundo ezitshiyeneyo sinanzelela njalo lenjongo ezitshiyeneyo. Lapho silandela inganekwane sinanzelela ukuthi ukuziphatha kwabantu kwakudalwa yizinto ezithile empilweni.
Sikhangele indaba yesithembu nxa silandelela inganekwane ezikhuluma ngesithembu, yikho lapho okusuka khona indaba zobuthakathi, umona kanye lenzondano phakathi kwamakhosikazi omnumzana. Ngokulandela inganekwane lezi kuba lesixwayiso esimangalisayo kulabo abalesithembu kumbe abakhangelele isithembu, ingozi ezivuka phakathi abantu sebehlala beqaphile ngemva kokuhlonyiswa.
Loba nje izolo isithembu lesi bekuluphawu bensizwa kodwa ukuhlalisana ngochuku phakathi kwamakhosikazi bekuveza sobala ukuthi akusiyo nje into encomekayo ekuhlalisanani kwabantu, indoda yayinganconywa ngokwenelisa kwayo ukuphatha isithembu sayo kodwa ubunzima babuyichitha impilo ngakolunye uhlangothi.
Kulapho-ke okuvela khona imbali yokuhlalisana ngokutshiyeneyo.
Online Reporter