admin
Thokozile Mbedzi
ZILOKHU zinkemile izakhamizi zesigabeni seMatembe eShurugwi ngemva kokuba elinye inina liganyulwe lafa ngoguluva ngoLwesine kuyonale iviki.
UMary Matongo oleminyaka engu-67 yokuzalwa kubikwa ugqekezelwe ngoguluva endlini elele lelinye inina elileminyaka engu-22 lapho abafike bathi bafuna imali andubana bamhlahlele ngebhemba.
Kubikwa oguluva laba babaleka leUS$200 le$4000.
Kuzwakale ukuthi uMatongo wazama ukuthatha ibhemba ukuze azivikele kodwa bamhluthunela bamgamula ngayo idolo.
Ekhuluma lentatheli kaMthunywa uMnumzana Bekithemba Nyoni uveze ukuthi yena lokhe edanile ngokwenzakeleyo esigabeni sabo.
“Oguluva bangenele ugogo elele lomunye endlini yabo ebusuku babahlasela bathi bona bafuna imali. Ugogo wathatha ibhemba ethi kazivikele kodwa bahle bamthathela ibhemba bamgamula idolo waqaleka.
“Bathe beqeda lapho bathatha iUS$200 le $4000 badliwa ngumswenya. Ugogo wahle wedlula engakahanjiswa esibhedlela,” kulandisa uMnu Nyoni.
Isikhulumi samapholisa esabelweni seMidlands uInspector Emmanuel Mahoko uthe udaba lwenina elihlaselwe lelinye langanyulwa lafa solufikile ehofisini yethu.
“Njengamapholisa sithanda ukuphinda njalo ukuxwayisa uzulu ukuthi angazami ukulwisana lezigebenga.
“Sicela uzulu ongabe elolwazi ngezigelekeqe lezi abikele amapholisa aseduzane laye ukuze izigelekeqe lezi zibotshwe,” kuphetha uInsp Mahoko
Online Reporter