admin
Thokozile Mbedzi
KULESIGELEKEQE esidingwa ngamapholisa akoBulawayo esetheswa icala lokuzenza ipholisa andubana lidlwengule amantombazana amabili aleminyaka engu-16 ahlala elokitshini leTshabalala koBulawayo.
Kubikwa isigelekeqe lesi sathi sihlangana lamantombazana la ayevela thenga isinkwa ngoMvulo ngehola lesikhombisa ntambama sabaqambela amanga ukuthi asebotshiwe ngoba engagqokanga ama-mask.
Kubikwa ababili laba esingeke sabaqamba amagama abo ngenhloso yokubavikela batshelwa yisigelekeqe leso ukuthi kulomkhankaso oqhutshwa ngamapholisa obizwa ngokuthi ngu-Operation Kawugqokanga mask okwabangela ukuthi bahle bethuke.
Ekhuluma lentatheli kaMthunywa uNkosazana Pauline Moyo uthe bahlukuluzekile njengezakhamizi ngesihluku esehlele abantwana bethunyiwe.
“Sihlukuluzekile kakhulu ngokwenzakale endaweni esihlala kiyo undoda lo uhlangane labantwana bakomakhelwane bevela thenga isinkwa ntambama bengagqokanga ama-mask wazenza ipholisa wathi sebebotshiwe ngoba bengagqokanga ama-mask.
“Waqala ukubaqhuba eqonda labo eWestgate bathe besendleleni wabadlwengula bobabili andubana adliwe ngumnyama.
“Sikhathazekile ngezigangi lezi ezihlukuluza abesifazane ngoba sezizinengi lapha. Njengabesifazana sesihlalele evalweni,” kulandisa uNkszn Moyo.
Isikhulumi samapholisa koBulawayo ulnspector Abedinico Ncube ebuzwa ngodaba lolu uvumile wathi udaba lolu solufikile ehofisini yabo ngakho uxwayisa uzulu ukuthi amapholisa ahamba emanengi nxa esenza umsebenzi.
“Udaba lwabantwana ababanjwe iganyavu solufikile ehofisini yethu ngakho sixwayisa uzulu ukuba amapholisa ahamba emanengi nxa esemsebenzi njalo ahamba okukhanya khona .Uzulu kaqaphele izephula mthetho lezi engaqilwa njalo bahlale beqaphele,” kuphetha ulnsp Ncube.
Online Reporter