admin
YiNtatheli kaMthunywa
KULENDODA yesigabeni seDekezi eFilabusi ethethe isithembo ehlahlele omunye wabonkosikazi bayo yamquma ikhanda layale kulandela ukumthola encinda uluju lwemvelo lomfana wenkomo, uMthunywa uyakuveza lokhu lamhlanje.
Indoda le okutholakale ukuthi nguZama Mafu kubikwa ikhulelwe yisikhwele ngesikhathi ithola unkosikazi wayo ohlala esiqintini esaziwa ngokuthi kuseNyoni elenye indoda yasimsukela yamhlasela, ithe iqeda lapho yathatha idibha yanatha izama ukuzibulala.
Isiga lesi senzakale kuyonale iviki.
UMthunywa uzwe ukuthi uMafu wakhela omunye unkosikazi wakhe umuzi esiqintini seSikhupha.
Esinye isakhamuzi sesigabeni lesi siveze ukuthi uMathe uthe efica umkakhe elenye indoda wamhlasela khonapho khonapho.
“Kukhanya uMathe ufice umkakhe elenye indoda ngokucwayiza kweso wadobha ihloka wamhlahlela ngalo ikhanda layale umzimba lawo wasala wodwa.
“Uthe esenze lokhu wathatha idibha wanatha kodwa kwehlule ukuthi limbulale ngoba omakhelwane bathe besizwa umkhosi baphanga baya emzini lo,” kuchaza isakhamuzi lesi esingazange sithande ukuqanjwa ngebizo.
Omele isikhulumi samapholisa esabelweni seMatabeleland South uInspector Loveness Mangena uthe indaba le kayikafiki ewofisini yabo.
“Indaba le kasikayamukeli kodwa njengamapholisa sithanda ukuxwayisa siphindaphinda kuzulu ukuthi nxa kulokuxabana kungaze kwaliwa kodwa abantu kabadinge usizo kwabanye ngoba udlame kaluqondanga,” kuchaza uInsp Mangena.
Imizamo yokukhulumisana lenduna yakulesi isigaba uSibasa yehlule ngoba ucingo belungangeni.
Online Reporter