adminYiNtatheli kaMthunywa
AMANTOMBAZANA adlala inguqu asekhuthazwe ukuthi azimisele ukuphakamisa ubungcitshi babo kulumdlalo ukuze benelise ukufinyelelela kumabanga emincintiswano yamazwe.
Lokhu kukhulunywe nguLewis Mazhara ngemva komqhudelwano wenkezo yeLM Auctioneers encintiselwe enkundleni yeHartsfield koBulawayo. UMazhara nguye osekela linkezo edlalelwa ngamathimu kuzwa akuligi yamantombazana kuleli kanye lamathimu amabili anxuswe evela kweleBotswana.
Amaqembu aphatheke kulinkezo agoqela iTownship Rollers yaseBotswana, InLine Academy, Hearts of Oak, Street Set, Flame Lily, Mufakose Queens leBlack Rhinos.
Inkezo le yiyo yodwa ekuzinga eliphezulu kunguqu yamantombazana osekwenze ukuthi ihlonitshwe ngamathimu akuleli lalawo akwamanye amazwe.
Kungxoxo abelayo lephephandaba likazulu, uMazhara ubike ukuthi ithalenta ligcwele kunguqu yamantombazana kodwa kumele abadlali balolonge ngamandla.
“Nxa singaqina ngokukhulisa abadlali bethu sibanikeza ulwazi lwenguqu olujulileyo, angiboni sisehlulwa kumincintiswano yamazwe.
“Imidlalo yenkezo enjengale eyeLM Auctioneers iyaphathisa ekuthini abadlali bethu bathole ithuba lokuzilolonga lokuzitshengisela emphakathini. Ngikhuthaza abadlali ukuthi bangagijimisi okunengi kodwa baqine ngokuziphakamisa emdlalweni,” kutsho uMazhara.
Umaqhuzu weLM Auctioneers lo wengeze ngokugcizelela ukuthi inkezo yakhe izahlala ikhona minyaka yonke ngoba usenanzelele ukuba amantombazana asafuna usekelo oluzwayo kunguqu.
“Le yindlela esifuna ukukhankasa ngayo ngokuqakatheka kokusekela amantombazana alethalenta lemidlalo ikakhulu kunguqu,” kutsho uMazhara.
Kusenjalo iBlack Rhinos yiyo intshantshu yalinkezo kulandela ukutshaya iTownship Rollers 4-0.
Online Reporter