admin
Thokozile Mbedzi
BEKUNGABIZWA ozwayo mhlaka 25 kunyanga esanda kwedlula koMthwakazi lapho abantu besigabeni seMatobo akade bethe gwaqa belinde ukuzwa ingqungquthela kwezokucomba umuzi yomnyaka ka2020.
Umkhosi wokucomba indlu ngobuciko usukhangelelwa minyaka yonke ngamehlo abomvu ngabesifazana besigabeni seMatopo nanko phela kuyabe kukhangelelwe ukuthi kubonakale umuzi oconjwe ngendlela elobuciko baphezulu okuyindlela yokulondoloza isiko lokugudula izindlu eliqhutshwa ngesikhathi sebusika ngabesifazana.
Lanxa umkhosi walonyaka uqhutshwe ngesikhathi kulobhubhane lweCovid-19 kulandelwe izixwayiso zabezempilakahle.
Ekhuluma lentatheli kaMthunywa uMnumzana Phathisa Nyathi uveze ukuthi bona bakubone kufanele ukuba umkhosi lo wenzelwe eMthwakazi ngoba kulendawo enkulu njalo evumayo ukulandela iziqondiso zababona ngezempilakahle.
“Umkhosi wokucomba lonyaka wenzelwe eMthwakazi ngoba kulendawo ekhululekileyo njalo enkulu ngoba kumele silandele iziqondiso zabezempilakahle njengoba kulobhubhane lweCovid-19.
Uqhubekele phambili esithi ngenhloso yokuthuthukisa ubuciko lobu badinge abamankampani ukuze baxhase umsebenzi lo.
“Sikubone kufanele ukuba ubuciko lobu sibuqhubekisele phambili ukuze bungatshabalali ngoba umsebenzi owawukhona izolo njalo wawusenziwa ebusika. Ngaleso sikhathi abantu bayabe bephumula abanye beseluka amacansi, ingcebethu abanye njalo bayabe begudula becomba izindlu zabo.
“Kungakho sakubona kufanele ukuba sinxuse abamankampani kumcimbi lo ukuba basiphathise ngemivuzo yabomama laba. Sinxuse amankampani amanengi abalisela iHalsteds, Kango, Fortwell lamanye amanengi. Intshantshu kumcimbi lo zinikwe imivuzo ebalisa ama-Jojo tank, amakhuba enkabi, amabhala, imiganu lokunye okunengi.
“Lokhu sokwenza omama babuya ngobunengi babo lobuciko babo sobuvela ngamandla amakhulu. Ngakho umcimbi lo sizahlala siwenza ukuze ubuciko obubonakalayo bungatshabalali ngoba kuyikudla kwamehlo okuqakatheke kakhulu empilweni zethu njalo okumele kulondolozwe nguye wonke umuntu,” kuchasisa uMnu Nyathi.
Umcimbi wokucomba indlu ngobuciko wasungulwa ngomnyaka ka2014.
Online Reporter