adminBabetsho beqinisile oNdukuzibomvu amajaha omkhonto nxa babethi kudala kwakunganje umhlaba uyaphenduka, ngeqiniso uyaphenduka bakwethu.
Noma kunjalo osokusenzakala kulezinsuku sokukunengi kakhulu ikakhulu ebantwaneni besikolo lababalisi abangasakwazi lokuthi bayafunda kumbe bayafundisa.
Abanye ababalisi kulezinsuku sebezenzela umathanda esikolo bakhohlwe ukuthi balandani. Uthola umphathisikolo kuthiwa ulenyanga engekho esikolo khonapho esazi ukuthi kumele abantwana bafunde.
Nxa ubuza uzwe kuthiwa usemhlanganweni okusuka kumangalise ukuthi ngumhlangano bani othatha inyanga yonke.
Indaba ezinje zenzakala kakhulu ezikolo ezisemakhaya ngoba ababalisi laba bayabe bethembe ukuthi akula ongabasola.
Lokhu sokuveza obala ukuthi ababalisi abenzenje kabajonganga ukufundisa abantwana kodwa bajonge imali kuphela.
Pho bazafunda njani abantwana nxa ababalisi bezenzela umathanda?
Ngikhuluma nje kulesinye isikolo esiseNkayi okuthiwa ababalisi bakhona bahlala bedakiwe noma besemakilasini, lomphathisikolo wakhona kalandaba labo.
Kambe umbalisi engafundisa njani ebuswa ngumagwebu ekhanda? Basafunda pho abantwana kulezinsuku bakwethu?
Abanye ababalisi uzwa kuthiwa babhuqane kwaba nzima bebanga umntwana wesikolo kumbe bebanga omunye umbalisikazi.
Lokhu kusuka kumangalise ukuthi kambe sebengenwe yini ababalisi sebevuka ubunke libalele. Nxa besenzenje kambe bengasithola ngaphi isikhathi sokufundisa abantwana njengoba bayabe bezibonela intombi kibo?
Bafundi lani kufanele livule amehlo libone okuphakwe khona imfumba lingaze lantula leganga okwentundu kaSobukhazi eyabonwa ngabantu. Kuhle ukuthi liziphathe kulokuthi lihle lizidele lizifanise lababalisi lina lingakafiki kulelozinga.
Nxa lisesikolo kuhle ukuthi likhangele ezesikolo kuthi nxa umbalisi sezidlisa satshanyana uhle umveze obala ungesabi ukuthi uzakuzonda kumbe uzakwenzani.
Kuhle ukuthi ilihlo lixhotshwe libhekile kulokuthi uqinisele uthi ngoba ngumbalisi kuhle ukuthi azidlele izithelo zendlela.
Cha akunjalo bafundi, vukani lakhe ikusasa yenu ngemfundo. Kwesinye isikhathi uzwa kuthiwa ababalisi abathize babhemisana imbanje labanye abafundi okusuka kwethuse ukuthi pho kuyabe kusasesikolo lapha kumbe kuyabe kusetshabhini.
Kuthi kunjalo abazali besabe ukukhuluma ngoba besesaba ukwethuselwa ngababalisi ngokuthi bazaxotsha abantwababo esikolo.
Kambe bengafunda njani abantwana nxa beqhubelana osekeledi lababalisi?
Ngeqiniso uthango solusidla amakhomane ezikolweni lapha bakwethu.
Bazali qaphelani ngoba abantwana sebephenduke izakhamizi lapha ezikolweni.
Kuqakathekile ukuthi nxa kukhona elikusolayo esikolweni lingaze lakutshaya indiva ngoba umntwana ongakhaliyo ufela embelekweni njalo ithendele elihle ngelikhala ligijima.
Bafundi yazini ukuthi ubude abuphangwa njalo imbiza ibila ngokukhwezelwa okuyikuthi kuqakathekile ukuthi likhangele ikusasa lenu ngokufunda litshiye ezabadala.
Abalesifiso soluxoxisana lozulu kuPhos’elakho bakhululekile ukuloba imibono yabo bayithumeze ku
[email protected] kume balethe emahofisini eChronicle lobabatshiye kulabo abathengisa iphephandaba.
Online Reporter