admin
Mehleli Dube
Banengi omalukazana abangalugxobiyo emakhaya akomkabo, babhejele ukuhlala edolobheni. Isimanga yikuthi umalukazana kumele okwakuqala abonge umamazala wakhe ukuthi umzalele indoda, emkhethe phakathi kwamatshitshi, lamaqhikiza ezintombi wabona kufanele ukuthi basungule umuzi wabo.
Omunye uze atshale inzondo lendodeni yakhe ukuthi azonde unina, afike abelidungamanzi ufice kungasakhulunyiswana umdeni uphasalale okomhlambi wempala othuswe yinkunzi yebhubesi ikhonya emathathakusa.
Abanye omalukazana uzwa besithi umamazala uyamloya, edinga ukuxega umkakhe lonina. Kwesinye isikhathi kusenziwa yibuvila lokwesaba ukunakekela isalukazi senkosi.
Labazukulu bafundiswe imfundiso yokuzonda ugogo wabo, kuthi nxa kusiza amakhefu afana lawePhasika kumbe aweKhisimusi sokumele kuyiwe ekhaya kutshaye kwembe phansi okungokhekhe okunye kuze kuzigulise kusenqabela ukuthi kungayi ekhaya.
Umamazala wakho kumele umhloniphe ngoba engunyoko, lencwadi engcwele iyakufakaza njalo iyalaya ukuthi hlonipha uyihlo lonyoko ukuze insuku zakho zande ezweni, pho wena ungubani ophikisana lemilayo kaMvelinqangi.
Ngake ngezwa omunye umalukazana esithi yena uzaze aye kubo komkakhe nxa uninazala angafa. Mhlawumbe wayelezizatho zakhe kodwa into okumele omalukazana bayiqaphele njalo bayibongele yikuthi lumuntu abamhlambaza kangako aze afiselwe lokufa, yikuthi wamzalela indoda njalo akuvamanga ukuthi umuntu angazonda unina kubangwa ngumalukazana nje, ngaphandle nxa laye wadlula zisengwa.
Libathande omamazala libanakekele kundingeko zabo ezemihla ngemihla, lapho obona angani uyaphambanisa khona tshela umkakho ambonise umuntu omdala lizaphila kamnandi kungela ngxabano.
Ayixabene.
Umlobi uthinteka ku 0714355641
Online Reporter