admin
Mehleli Nkunziyembongolo Dube
Zizalwane zeZimbabwe siphila ensukwini ezinzima, njalo ezinye inkinga zakhona lokho mina lawe sathwetshulwa yingwe asikaze sihlangane lempicabadala enje, kuqale ngokuna izulu elabangela ukufa kwabantu emhlubulweni weMpumalanga nyakenye kwalandela umqando owaqeda izifuyo, lokutshisa kwelanga ungani lehlisiwe kancane endaweni yalo, khona manje sokulomkhuhlane okuthiwa ukuze ungamemetheki njalo singathelelani sekumele sitshone sisezindlini njalo sibe khatshana lakhatshana.
Lokhu mhlawumbe uMdali ubonisa ulaka lwakhe ngoba kukhona njengabantwana bakhe esingakuhambisi ngendlela afuna ngayo, phela sekukunengi ukuganga emhlabeni wonke jikelele, yikho kungakho ngithi asibambaneni sibe yimbumba sihlabe phansi ngedolo sicele kuMvelingqangi ukuthi singaba sonile kungesingamabomo asixolele.
Akukhathalekile ukuthi ungowaliphi ibandla kodwa engikwaziyo yikuthi wonke umuntu ophila emhlabeni uyazi ukuthi kuloNkulunkulu onguye osivikela kuzigamekiso ezinengi.
Thina abantu sasikhohlwe ngoMdali nxa sisakhomba ngophakathi sithi nxa sesitshaya inja ngekhanda kuyikhona sesikhumbula ukuthi kuloMdali yena ongelasikhwili njalo ongabekimuntu sikhupha.
Zinengi izinto ezingasahambi ngendlela esiyaziyo ikakhulu thina esesimkantshubomvu. Emandulo kwakuthi kuvela into ezinje ezisanganisa asebempunga ingqondo kuhlalwe phansi kukhulunywe laye uMdali ngendlela ezitshiyeneyo. Nxa singasacelanga eNkosini ukuthi lezi zinkedama ziphele, mina lawe sizohlala sihlulukelwe ungani yiwenka edlelwe amaqanda isizacamusa.
Ayixabene.
0714355641
Online Reporter