admin
Silo Mehleli Dube
UDingindawo umngane wami wathi eseleminyaka engamatshumi amathathu wazibona esekhulile esezibona eyindoda ngoba intanga yakhe yayisiyelamisile. Wathi esedolobheni wadibana lentombazana, wayemuhle umntanomuntu akukho lutho owawungaluswela okumele lubekhona emuntwini wesifazane, wayenguphuma langasikothe, amazinyo akhe ayemhlophe okwenyanga ekhanyela emanzini kulenkanyezi.
Wathi esesiyabikela uyisekazi ukuthi usethol isipalaphala sentombi esesithethe inhliziyo yakhe yaphuphuma ngothando. Uyisekazi uthe esebuzisisa ukuthi ngeyakobani leyontombi, wamchazela abakibo bentombi.
Uyise kaDingindawo wathi eseselijaha wathandana lonina kaTholakele intombazane eyayifuna eyayisithethe uDingindawo amehlo. Uyisekazi waqala wathula eswela ukuthi angamtshela kanjani umntakamnewabo ukuthi ngeke kwenze ukuthi atshade loTholakele ngoba beligazi linye.
Ngenxa yokuthi uDingindawo wayesezimisela njalo lemali yamalobolo eselayo, uyisekazi ngokubona ukuphitsheka kukaDingindawo waqunga isibindi wamtshela ukuthi uTholakele, ngudadewabo ngoba uyise wathi elijaha wona unina kaTholakele, kodwa ngenxa yokuthi babengomakhelwane wathatha isisu wayasinika omunye ujaha wavuma engazi ukuthi sevume ivuntshe elingasilolakhe.
Ngenxa yokuthi uDingindawo wayelokhu ebuza kuyisekazi ukuthi kungani ethi uTholakele ngudadewabo. Wathi ekuzwa lokho wadideka, wafikelwa lulaka ngoba wayemthandile umntanabantu engazi ukuthi ngudadewabo, waze waphumisela wathi yikho incwadi engcwele kubhaliwe ukuthi ungafebi nampu ubufebe bukayise sebemkhuthisa ukutshada lentombi yena ayecabanga ukuthi bazaze behlukaniswe yikufa kanti kabuzanga elangeni.
Wathi laye esetshela uTholakele umhlolo ayewuzwe ngoyisekazi kwenza bengasathathani wazonda wajuluka wanuka okobulongo bechalaha obunethwe yimbolisamahlanga, wasezibona esengumalukazana, eseguqela uyise kaDingindawo.
Wasuka lapho wayabuza unina lakanye unina wamtshela ukuthi wayesesengumntwana isikhathi esoniwa nguyise kaDingindawo ngoba imuli zabo zazakhelene sekuze kungani kulobuhlobo abakoDingi babebiza abakoTholakele bethi kukoyisemncane nomanje kwakungela buhlobo begazi yikho okwenza unina katholakele wafihla isisu wayasiphosela kwenye indoda.
Wehlula kanjalo umtshado kaDingindawo loTholakele. Ayixabene.
Mehleli Nkunziyembongolo Dube.
Umlobi ungamthinta ku 0724355641
Online Reporter