admin
Thokozile Mbedzi
INHLANGANISO yeAgritex ikhuthaza abalimi kundawana zonke zelizwe ukuba kabaqalise amalungiselelo okulima ngokuvuselela amagodi.
UAgritex Officer wesabelweni seMatabeleland North uMnumzana Dumisani Nyoni ekhuluma lentatheli uthe abalimi sokumele baqalise amalungiselelo okulima khathesi ngoba isikhathi sesisondele.
“Abalimi kumele baqale amalungiselelo okulima khathesi ngoba isikhathi sesisondele. Kabaqale ukugebha amagodi ngoba abanengi bathole isivuno esihle kulandela ukulandela uhlelo lweNtwasa/Pfumvudza.
“Sikhuthaza abalimi ukuthi bavuselele amagodi abo ukwenzela ukuthi bahlale belungiselele. Kuhle ukuba bahle bafake amahlanga loba utshani ngoba lonyaka kunengi,” kutsho uMnu Nyoni.
Uthe okunye njalo okumele abalimi bakwenze yikuhle bathenge inhlanyelo beqeda kuthengisa izilimo zabo.
“Abalimi sibakhuthaza ukuba baluqakathekise uhlelo lweNtwasa ngoba loba izulu lililutshwana umlimi uyathola isivuno sakhe esihle okwenza isizwe sithole isivuno esihle njalo lesiphala selizwe sibe lokudla okweneleyo.
“Ngesikhathi lesi abalimi kababone ukuthi konke abafuna ukukusebenzisa ekulimeni sebekubuthelele okubalisela inhlanyelo kunye lamafethalayiza.
“Ukubuthelela lokho abazakusebenzisa kuzenza bengalahlekelwa yisikhathi njalo bengaphaphatheki besiya le lale izulu selisina kodwa kuzenza benelise ukusebenza kuhle njalo bahlele kuhle ukuba inhlanyelo zabo bazihlanyela ngendlela abafisa ukuzihlela ngayo,” kulandisa uMnu Nyoni.
Online Reporter