admin
Wayne Ncube
ABALIMI sebexwayiswe ukuthi banakekele izifuyo zabo njalo babone ukuthi kazilazilonda ngoba zilakho ukuba yingozi kumpilakahle yazo loba ukuzibulala.
Izifuyo ezinengi iloba izinja zilakho ukubulawa yizilonda ngemva kokulunywa yizinanakazana lemikhaza ikakhulu le eyandise ukutholakala ngesikhathi sezulu ehlala etshanini.
Ekhuluma lentatheli uMnumzana Mkhumbuli Siziba ongumlimisi omkhulu olilunga leZimbabwe Farmers Union ubike ukuthi okwenza izilonda zixhwale zimpukane kanye lokunethwa lizulu ngoba kuzenza zingapholi.
“Kuqakathekile ukudibhisa inkomo, izinja lezinye izifuyo kanye ngenyanga ukwenzela ukunqoba ukukhula kwezilonda lokukhithiza imikhaza emzimbeni yezifuyo.
“Lokhu kuyaphathisa kakhulu, ngoba izilonda lazo ziyacakisa izifuyo kucine kusiba nzima kumpilakahle yazo,” kulandisa uMnu Siziba.
Abalimi baphinde bakhuthazwa ukuthi lapho sebebulala inhlamvane kanye lokomisa izilonda bengasebenzisa umuthi okuthiwa yi-Exit bangananzelela izilonda ezifuyweni zabo kumbe njalo bangasebenzisa iloba i-petrol ukomisa izilonda masinya.
“Umlimi kavalele inkomo zakhe ngesikhathi sezulu ngoba kungela ndingeko yokuzihlalisa egangeni njalo lokhu kuyancedisa ekuvikeleni izifuyo ukubamba imikhaza, njalo kuyaphathisa ukuthi umlimi azibone lula nxa sezilezilonda,” kuchaza uMnu Siziba.
Imikhaza iyingozi ikakhulu emathokazini lapho imikhaza esingaluma imbele ivuvukise inkomo njalo iphinde ibangele ukufa kwenkomo lamathole.
“Amathokazi amanengi alakho ukuthi avuvuke imbele engalunywa yimikhaza le okwenza ukuthi isifuyo sicine sicuba,” kuphetha uMnu Siziba.
Online Reporter