admin
Wayne NcubWayne Ncube
ABALIMI bonke jikelele sebekhuthazwe ukuba bangafaki phansi amajogwe okulima ngenxa yesifo somkhuhlane we-corona esesihlasele umhlaba wonke ukuze abantu bathole ukudla.
Ingcitshi kwezokulima lokufuya kunkampani yeFarm and City Centre uMnumzana Raphael Ncube, ukhuthaze abalimi ukuba kabalime bangayekeli ukuze abantu bathole ukudla ngesikhathi esifana lalesi esikuso.
“Igcikwane le-corona eselihlasele umhlaba wonke akwaziwa ukuba lizaphela nini njalo lokhu kufaka umlandu kubalimi ukuba balime ukuze benelise ukuthengisela abantu ukudla.
“Abalimi bengayekela ukulima ilizwe lonke lizahlaselwa yindlala ngoba sokuseduzane ukuba kuvalwe izitolo kanye lemikambo yonke yokudla ngakho ithemba lizakuba kubalimi,” kuchasisa uMnu Ncube.
Abalimi abakhulu labo baxwayiswe ukuba kabadinge ezinye izandla zokuncedisa ukuvuna kusase lesikhathi ukuze labo bengalahlekelwa yisivuno sekuvaliwe ukuba abantu kabaphume phandle.
“Banengi abantu asebemiswe imisebenzi ngendaba yegcikwane leli, indawo zokusebenzela ezinengi sezivaliwe okutshiya abantu bengelazindawo zokuthola ukudla.
“Kuqakathekile ukuba abalimi badinge izandla zokuncedisa ukuvuna kungathathi isikhathi eside njalo lokhu kungancedisa umlimi ukuthi angalahlekelwa yinzuzo yakhe emasimini,” kuchaza uMnu Ncube.
Uphethe ngokuveza ukuba abalimi bakuleli bathwele nzima ekulimeni izulu lilincane, kanye lenkomo zicuba njalo akumelanga baphinde balahlekelwe yisivuno.
“Kumele sikhangelisise ukulahlekelwa okwenzakeleyo ngesikhathi kungela zulu, abalimi kabavune kusemasinyane ukuze benelise ukuthola inzuzo ngesivuno sabo njalo benelise ukuphathi kumkhonomi ngesikhathi segcikwane le-corona.
“Siyacela abantu abangancedisa abalimi ukuba balime njalo bavune kusase lesikhathi ukuze abantu bakuleli benelise ukuthola ukudla njalo labalimi bathole inzuzo,” kuphetha uMnu Ncube.
Online Reporter