admin
Nkosilathi Sibanda
KUVIKI ephelileyo uMark Harrison ubengumqeqetshi wesithathu ukwehlukana leHighlanders, okuyisitshengiselo sokuthi leliqembu alibhadali.
Ukungabhadali abaqeqetshi kubikwa ayizenzi iHighlanders kodwa yenziwa yisimo esibangelwe yiCovid-19, esesitshiye amathimu enguqu amanengi umhlaba wonke engela indlela zokudinga imali yokuqhuba ibhizimusi lezemidlalo.
UHarrison ubeholiswa lihlekana labasekeli beBosso bencedisana lesikhwama seqembu kodwa ngenxa yeCoronavirus, sekusehlula ukuthi baqhubeke bemholisa imali eneleyo njengesivumelwano.
Njengamaqembu wonke akuleli kunguqu, abaqeqetshi labadlali baphiwa impilakahle kumali etholwa liqembu nxa lithe lathola usekelo lwababukeli.
UMthunywa ukwazi mhlophe ukuthi uHarrison walile ukuphiwa iholo elehlisiweyo.
Kodwa okumangalisayo, inengi labaqeqetshi bebhola lenyawo kumaligi alemali eNgilandi lase-Spain bayavuma ukuphiwa iholo elehlisiweyo.
UHarrison, obesebizwa ngokuthi nguHadebe ngabalandeli beqembu, uthe kungcono abuyele kibo eNgilandi kulolutho ayehliselwe iholo.
Isikhulumi seBosso uRonald Moyo uthe ayisikho ukuthi uHadebe usehambile kokuphela.
“Umqeqetshi ufuna ukuba lemuli yakhe ngalesi isikhathi. Kulinyathelo elithethe isikhathi kanye lokucubungula isimo esikuso,” kutsho uMoyo.
UHarrison uba ngumqeqetshi wesithathu lonyaka ukutshiyana leHighlanders. Ngeviki edluleyo uMthunywa wazise ngokuthi uDan Ngwenywa obeqeqetsha amaqembu abadlali abasakhulayo kuBosso laye ukhalale umsebenzi. UNgwenya ulandele uSiza Khoza loGift Lunga Junior ukufulathela iqembu.
Isisusa senyathelo labaqeqetshi bonke yikuthi akula mali kuHighlanders.
Kodwa ke, ayisilo lodwa iqembu elilahlekelwa ngabaqeqetshi labadlali ngesikhathi seCovid-19.
Online Reporter