admin
Johas Moyo
ZIZONDE zigane unwabu izakhamizi ze-Old Luveve koBulawayo ngesenzo senye indoda ephila lobugoga okubikwa igilisa abafundi imikhuba emphakathini nanko phela ibathengisela izidakamizwa phezu kwalokho ibagcwalise phamu endlini besenza ama-short time, uMthunywa uyakuveza lokhu lamhlanje.
Indoda le uTrust Mlalazi oleminyaka yokuzalwa engu-32 kubikwa uthengisela abafundi beNyanda imbanje bathi bangadakwa abesebapha indawo yokuthi basuthise inkanuko zemizimba yabo osekusenza izakhamizi zithukuthele ngalezizigigaba.
Omunye umakhelwane kaMlalazi ugogo uMaNyoni ubikele intatheli ukuthi umzukulu wakhe usebhema njalonje imbanje ngenxa yakhe.
“Umzukulu wami wafundiswa nguyena lo umfana izidakwamizwa angazi lokuthi kungani amapholisa engambophi sibili ngoba usixhwalisela abantwana,” kutsho ugogo uMaNyoni.
Esinye njalo isakhamuzi esingumakhelwane uSibongile Tshuma sikhalaze kakhulu ngabantwana abatshona bebhuza sampukane endlini kaMlalazi bezodinga izidakamizwa lezi ezibafiphazela ikusasa yabo. “Ngidaniswa ngamapholisa lezinye inkokheli zethu ezekela abantwabethu bephiwa itshefu abantu bekhangele njalo bengathathi icebo lokuqeda loluhlupho,” kutsho uNkszn Tshuma.
UMthunywa wenelisile ukufika kuleyondlu wakhulumisana loMlalazi ovumileyo ukuthi uyake athengise izidakamizwa.
“Mina sengileminyaka embalwa ngithengisa izidakamizwa kodwa khathesi kangilazo njalo kangandisanga ukuthengisela abantwana bezikolo, icala leli abangethesa lona lokupha abantu indawo yokuthi basuthise inkanuko zabo zenyama kangilazi kodwa kangali ukuthi abantu bayake belale lapha ngoba bengabangane bami njalo abanye zintombi zami, phela mina ngiyinkonjwa,” kutsho uMnu Mlalazi.
UMthunywa uxhumane loKhansila wendawo uTamani Moyo yena ovumileyo ukuthi sokufikile endlebeni zakhe ukuxhwala okwenziwa ngundoda lo ophila lobugoga njalo basazama ukuthi bathole indlela yokuqeda uhlupho lolu.
“Mina ngikuzwile lokho kuganga okwenziwa ngujaha lo ukuthi uxhwalisa abafundi njalo abanye kabasafundi ngoba bayabe bedakiwe kodwa njengenkokheli siyazama ukuqeda loluhlupho njalo sicela lezakhamizi ukuthi zibambisane lathi sisize abantwana bengabulawelwa ikusasa labo sikhangele,” kutsho uKhansila Moyo.
Online Reporter