admin
Thokozile Mbedzi
ZIKHALA ezimathonsi izakhamizi zeZezani esabelweni seMatabeleland South ngendlala esibhahile kulumango osokubangele ukuthi inengi lazo zilahlekelwe zinkomo.
Kubikwa kusukela ngenyanga kaMfumfu sokulesilinganiso senkomo ezingafika ku-45 phesenti esezifile ngenxa yendlala kule indawo.
UMthunywa ukhulumisane lomabhalane weVeterinary Services esiqintini seZezani uMnumzana Tswenyeyo Sibanda oveze ukuba inkomo seziphelile kule indawo ngokubhalela emadakeni kubangelwa kakhulu yindlala ekhona.
“Sokulesilinganiso senkomo ezingafika ku-45 phesenti ekhulwini esezifile kule indawo ngenxa yodaka kanye lokubhalela emadakeni.
“Okubuhlungu yikuthi nsukuzonke ziyafa inkomo ngoba ziyabe zidinga amanzi zicine sezibhalela edakeni zona zivele zingelamandla,” kulandisa uMnu Sibanda.
Uqhubekele phambili wathi okubangela ukufa kwenkomo yikuthi izakhamizi kazila mali yokuthenga ukudla kukanti njalo kazithengiseki ngoba zicakile.
Intatheli kaMthunywa yenelise njalo ukuxoxisana lezakhamizi zakule indawo eziveze ukuthi zilahlekelwa yinotho yazo zikhangele kungekho ezingakwenza.
“Njengezakhamizi besesithembile ukuthi izulu selinile sokuzaba lobubele kanti yikho ubunzima busiba ngamandla ngoba phela inkomo sezinatha amanzi emfuleni lemachibini zihle zibhalele khonapho zicine zisifa ngoba akukabi lotshani emangweni wakithi,” kutsho uMnumzana Lithobola Moyo.
Uqhubekele phambili eveza ukuba usefelwe zinkomo ezedlula 15.
Esinye njalo isakhamuzi uNkosikazi Rominic Siziba ugcizelele wathi izakhamizi sezivuka zibhoda zidinga izifuyo ngoba zicuba njalonje.
“Izifuyo zethu zicuba nsukuzonke asisakwazi lokuthi sithini ngoba lotshani kabukabi khona. Mina sengifelwe zinkomo ezintathu sikhuluma nje.
“Inkomo ziyasiphathisa kakhulu empilweni yethu ngoba yizo esizithengisayo ukuze siphile pho nxa sezisifa kutshengisa ukuthi lathi akusekho esizaphila ngakho kodwa sesizadubeka. Sicela uhulumende asiphathise ngokudla kwezifuyo ngoba sesihlezi sizidla izibindi ukuthi sizaphila ngani lemuli zethu,” kutsho uNkkz Siziba.
UMnu Sibanda uphethe ngokucebisa izakhamizi ukuthi zizame ngazo zonke indlela ukudingela izifuyo zazo ukudla ukuze zingacubi.
Online Reporter