Online Reporter
Nkosilathi Sibanda
KUZOBA ncane indawo enkundleni zokuzithokozisa kumncintiswano wemigido yomdabu iChibuku Neshamwari Traditional Dance Festival.
Lonyaka, abaqoqi balumncintiswano babika ukuba umkhulu njalo sebelungele ukuthi amaqembu avuthise inkundla izwe lonke kusukela mhlaka 9 Nkwenkwezi kusiyafika ku-final mhlaka 11 Ntulikazi.
Umncintiswano lo kukhangelelwe ukuthi uhlanganise umphakathi ekuthakazeleleni amasiko lezomdabu.
Umkhosi lo, uxhaswa yiDelta Corporation ngokusebenzisana leNational Arts Council of Zimbabwe leZimbabwe National Traditional Dance Association.
Ubalelwa phakathi kwemincintiswano emqoka ekuvuseleleni imigido yesiNtu ebisiphela udumo lwayo ngenxa yokuthi abantu sebethanda amasiko ezinye izizwe.
Enye inhloso yeChibuku Neshamwari Traditional Dance Festival ngeyokuphakamisa amaqembu aphatheka kumigido yesiNtu ngemivuzo yemali.
Uhlelo lwalonyaka luthembisa okukhulu kwezamasiko ngaphansi kwesihloko esithi:
“Ngoma Ngairire Shamwari, Tshay’ sgubhu Mngane”.
“Umkhosi uzoqala mhlaka 9 Nkwenkwezi uze uyefika mhlaka 11 kuNtulikazi, usabalala kuzabelo zonke ezilitshumi zelizwe,” kubika abaqoqi bomncintiswano kumbiko wabo othunyelwe kuliviki.
Umncintiswano lo uletha imivuzo emikhulu, njengoba abanqobi ezigabeni bazathola i-US$2 500, i-US$1 500 abazahlala kunombolo yesibili kuthi abesithathu bathole i-US$1 000.
Kumncintiswano wezabelo, umvuzo wakuqala ulomvuzo we-US$15 000, owesibili US$10 000 kuthi owesithathu yi-US$7 500.
Umkhosi uzaqala koBulawayo mhlaka 9 Nkwenkwezi ususuka lapho uye eMt Darwin, Gutu, Gwanda, Murehwa, Harare, Chinhoyi, Victoria Falls, Nyanga leKwekwe.
Abaqoqi bomncintiswano bathe amaqembu afisa ukuncintisa kumele abhalise kuNational Arts Council of Zimbabwe leZimbabwe National Traditional Dance.
Kusukela emaphandleni kusiyafika emadolobheni, iChibuku Neshamwari Festival iyaqhubeka isiba yinkundla yokubonisa lokuphakamisa amasiko.
Ngomnyaka odluleyo, iqembu leGreen Stars eleHarare laba yintshantshu, kuma-finals ka-2025 aqhutshelwa eMutare Showgrounds, bathola umvuzo we-US$15 000.
Iqembu leGoromonzi Arts Ensemble elaba ngelesibili lathola i-US$10 000.
ISemvumba Arts Ensemble yaphetha isendaweni yesithathu yathola i-US$7, 500.
Peter Tanyanyiwa