Danisa Masuku
UKHANSILA kaWadi 26 koBulawayo uMpumelelo Moyo usebuyele ejele ngemva kokuba isicelo sakhe sokuphikisa isigwebo sokutholakala elecala lokufumbathiswa i-US$20 000 sehlule emthethwandaba omkhulu koBulawayo ngoba kulamaphutha asencwadini zesicelo sakhe.
Umehluli womthethwandaba omkhulu, uMunamato Mutevedzi wesule udaba lolu kuluhlu lwamacala waxwayisa amagqwetha kaMoyo ukuthi baqale balungise amaphepha abo ngaphambi kokuthi baqhubeke ngesicelo lesi.
Ingqwetha likaMoyo, uMnumzana Tinashe Runganga oweTanaka Law Chambers, uthe amaphepha esikhalazo aphambaniseka ngemva kokuthi uMoyo etshintshe amagqwetha amanengi.
“Bekulobunzima ngamaphepha asemthethweni afakwe kuhlelo lwamakhompuyutha. Umuntu ofake isikhalazo watshintsha amagqwetha kanengi,” kutsho uRunganga.
Uthe amagqwetha akuqala afaka isaziso sokudlulisela icala kanye lezizatho zokuphikisa isigwebo ngoNhlolanja, kodwa amaphepha la ayengela sayinetsha. Igqwetha lesibili lalo lafaka amaphepha afanayo njalo laletha izizatho ezisemthethweni.
“Kwathi sekungene mina, ngacelwa ukuthi ngifake izizathu zokuphikisa isigwebo. Ezinye izizatho ezazifakwe ngamagqwetha akhe okuqala kwakumele zisuswe kumarekhodi, kodwa lokhu akuzange kwenzakale.
“Ngakho ngesikhathi sisiyalalela udaba lolu, umehluli uthe kasazwisisi ukuthi udaba lumi njani ngoba kunengi okusezincwadini. Khathesi sekumele siqale phansi silungise amaphepha, yikho ebiselwe ejele. Lanxa kunjalo, sisebenza ngodaba lolu,” kutsho uRunganga.
Amalunga eZimbabwe Anti-Corruption Commission (ZACC) abopha uMoyo ngemva kwesikhatshana ethethe imali le kummeli wenkampani uTsitsi Nyathi emzini wakhe, ngemva kokuba umamangala ehlele icebo lokumbamba.
Ngokombiko owethulwayo, uNyathi wayemcele ukuthi aye emzini wakhe ukuyathatha imali engange-US$20 000. Kubikwa uMoyo wathi amakhansila angu-20 ayencedise ukuthi indawo le ivunywe, njalo ngamunye babefuna i-US$1 000.
UMoyo wayemelwe nguMnumzana Prince Butshe oweButshe and Partners ngesikhathi kuqala, njalo nguye owafaka izizatho zokuphikisa isigwebo. Ngemva kwalokho waqhatsha uMnumzana Nqobani Sithole, wacina esesebenzisa uRunganga.
