admin
Nkosilathi Sibanda
WAVELE wakutsho uBongani Mafu ukuthi yena ungumqeqetshi olobungcitshi baphezulu, nanko sekubonakala ngendlela iqembu lakhe elikhethuza ezinye ngayo kuDivision 1.
UMafu uqeqetsha iHwange, iqembu elihlose ukuthi liphenduke enkundleni zeligi ephakemeyo eyePSL.
Ukuzimisela kwabadlali bakaMafu sekubonakale kumidlalo edluleyo. Ngempelaviki iHwange ibhabhathize iNdlovu Iyanyathela ngokuhlohla amabhola angu-7 kwelilodwa.
Ukubika engafihli uMafu ukuthi lonyaka abantu bazakuzwa ngemisebenzi yakhe.
“Inhloso yami yikunqoba, ukusebenza gadalala lokuthi imisebenzi yami ibonakale enkundleni,” kutsho lumqeqetshi ngemva komdlalo ngempelaviki.
Iqembu leHwange kukhangelelwe ukuthi libe yintshantshu yenkezo yeWafa Wafa ezadlalwa kunsukwana ezilandelayo.
Kusenjalo, ziyaqhubekela phambili izigigaba kuligi le nanko iqembu leRatanang lidlale lingela baqeqetshi balo mhla lidibana le Arenel.
Abaqeqetshi beRatanang uInnocent Mapuranga loChipo Tsodzo baxotshelwe phandle ngoba kubikwa abalazo incwadi zokusebenza. Kube yisimanga ngoba kumidlalo yakuqala kuligi le, abaqeqetshi laba bebevunyelwa ukukhuza iqembu labo.
Udokotela weqembu u-Angelina Musaengana nguye kuphela obehlezi ebhentshini.
Loba abaqeqetshi laba bevalelwe phandle, iRatanang ikwazile ukunqoba, okwesibili kwesizini ngemva kokutshaya iTalen Vision nge 1-0 emdlalweni wabo wokuqala.
UMapuranga uthe abakhathazekanga, kodwa bahlose ukuya phambili.
“Ngodaba lwelayisensi, lokho kuzahlelwa kuleliviki. Siyazethemba ukuthi ngosuku lomdlalo olulandelayo konke kuzabe sekulungile. Njengeqembu kulisizini sihlose ukuqinisekisa ukuthi sihlala kuligi,” kutsho umqeqetshi lo.
“Ngijabulile ngokuthi siyiqale kahle isizini. Manje abafana kumele benze isiqiniseko sokuthi bayanqoba njalonje.”
Imidlalo yeviki lesithathu:
NgoMgqibelo:
Binga Pirates v Arenel (Binga High School), Casmyn v CIWU (Turkmine) Ajax v Hwange (White City), ZPC v Indlovu Iyanyathela (Ingagula) , Bosso 90v Mainline (White City), Mountain Climbers v Mosi Rovers (Luveve) Ratanang v Quality Foods (Luveve)
NgeSonto:
Indosakusa v Emakhandeni (Luveve) Zimbabwe Saints v Talen Vision (White City)
Online Reporter