admin
YiNtatheli kaMthunywa
UCASTER Semenya ubavale imilomo bonke abayizitha zakhe kulandela ukunqoba kwakhe kumjaho we-800m ngemizuzu engu-1.55.28, wathi eqeda lapho wazithintitha amahlombe sakukloloda obekuyindlela abetshengisa ngayo bonke laba abalenkinga ngobulili bakhe ukuthi ungumpetha wama-Olympics, eRio de Janeiro, eBrazil.
Kusukela aqala ukuvelela kuleli banga, uSemenya ulenkinga yokuthi indlela adalwe ngayo ayijwayelekanga njalo kulabantu abakholwa ukuthi akufanelanga ngabe ugijima labesifazane. Phambilini ibibukeka sengathi iyamphazamisa uSemenya into le.
Ngaphambi kokuthola igolide eRio de Janeiro bekusekhona inkulumo le ikakhulukazi phetsheya kolwandle kodwa ubebonakala ukuthi ukuthatha njengesikhuthazo njalo ubebhala lasezinkundleni zokuxhumana ukuthi uzazivala imilomo izitha zakhe.
Ngemuva kokunqoba, intokazi le eleminyaka engu-25 ubudala, ifike yabahlekisa onozindaba.
“Kusemqoka ukuthi sithandane emhlabeni. Asikho isidingo sokuthi sizondane ngoba sonke singabantu. Asikho isidingo sokuchothoza abantu ngoba bebukeka ngendlela ethile. Ukuthi bakhuluma ngendlela ethile kumbe bagijima ngendlela ethile,” kutsho uSemenya.
“Mina nxa ngilungiselela umjaho angizikhathazi ngokuthi abantu engiyoqhudelana labo babukeka kanjani. Okwami yikucabanga ukuthi ngizokwenzenjani ukuze ngiphumelele. Okusemqoka yikuthi sisebenze ngokuzikhandla singabasubathi ukuze sibe ngcono. Indlela esibukeka ngayo ayibalulekanga.”
Online Reporter