admin
Bongani Ndlovu
AZILANKANI izakhamizi zeMakhandeni ngemva kokuba elinye inina leMakhandeni lidonsele umkalo enkantolo ngemva kokuba elibambe lilesinye isithandwa endlini.
Iphephandaba likazulu lizwe ukuba umsolwa uMnu Never Sabumba oleminyaka yokuzalwa engu-37 wabuya endlini yakhe ehamba labangane bakhe ababili ngemva kokuba ethole umbiko wokuba umkakhe uNkosazana Florence Chivhima oleminyaka engu-32 wayezikhohlisa lenye indoda uRonald Chariga oleminyaka engu-38.
Elandisa icala umtshutshisi wecala ubike ukuba umsolwa wangena endlini ngemva kokuba ethole ilizwi lokuba umkakhe wayesexhwalile kungakho umsolwa wabuya evele eseganu unwabu. Kubikwa umsolwa wangena ehamba labangane bakhe ababili bethwele izitina abafika bazisebenzisa ukuhlasela ngazo omamangala uRonald loFlorence ngaphambi kokuba bengenele amafasitela endlini lawemota kaRonald iSprinter babulala amafasitela baphinda njalo bahlaba amavili emota.
Ebuzwa ngecala lakhe uNever Sabumba ngumantshi u-Urgent Vundla umsolwa wale wemba phansi esithi yena uFlorence nguNkosikazi wakhe.
“Nkosi mina uFlorence ngunkosikazi wami, silabantwana abane. Okwangizwisa ubuhlungu yikuthi ngamthola lenye indoda endlini yami.”
“Akusilo qiniso ukuthi sileminyaka emibili sehlukana ngoba ngakibo lokhe ngibizwa ngelokuthi mkhwenyana, imuli yangakibo ingakufakaza. Labo sebamkhuza ngokungathembeki kwakhe emzini wethu,” kuchaza uSabumba.
Ekhuluma emthethwandaba uNkosazana Chivima ubikele inkundla ukuba uSabumba lixhoki lendoda.”
“Iqiniso yikuba mina lomsolwa silabantwana abane sonke kodwa sesilemnyaka emibili singahlali sonke. Ngempelaviki wabuya elabangene bakhe basihlasela ngezibhakela kanye lezitina. Ngemva kwalokhu babulala amafasitela endlini kanye lawemota kaRonald,” kuphetha uFlorence.
Ngemva kokulalela ubufakazi lobu umantshi uthe bazaphenduka emthethwandaba lapho abazathola khona isigwebo secala.
Online Reporter