admin
UFANA ubeseleminyaka engu-17 elindele ukutshada lesimomondiya sakhe, isithwandwa senhliziyo yakhe kodwa wehlelwe ngamashwa lapho umkakhe esifa ngosuku lwabo lomtshado.
Lokhu akuzange kumlahlise ithemba lokuthi uzatshada nanko phela uqhubeke wahlanganiswa lesithandwa sakhe iloba besesiwutshiyile umhlaba.
UFana Maphumulo oleminyaka yokuzalwa engu-43 umane wahlanganiswa loNana Mkhize (42) osengumuyi ngoba ezitshele ukuthi balinda iminyaka eminengi kakhulu ukuthi benze umtshado.
Ngokutsho kwabasiki bebunda, uNana wabikela uFana ukuthi waphupha esinye isalukazi simtshela ukuthi uzakufa mhla womtshado wakhe.
Bakutshaya indiva lokhu bakuthatha njengephupho bamane bahleka ngakho nje.
Kodwa iphupho leli libe liqiniso lapho uNana ohlala kuG Section, eMlazi eThekwini esifa kusele nje ihola elilodwa ukuthi atshade.
Ubelaliswe esibhedlela ekhala ngokuthi uzizwa engelamandla.
Abantu abangamakhulu besebebuthene belinde ukuzabona laba bobabili behlanganiswa ngumfundisi kukanti qha umakoti ubesewutshiyile umhlaba.
UFana uqhubeke ngomtshado eyedwa.
Ucele umfundisi ukuthi akhuleke andubana agqoke indandatho zombili esandleni sakhe.
UFana loNana besebechithe iminyaka engamatshumi amabili bebonke.
Balabantwana abane njalo besebeleminyaka eminengi behlela umtshado wabo. Ufana uthe kwathatha iminyaka eminengi ukuthi baze batshade ngoba imali yayingekho.
Ukhulume labephephandaba leDaily Sun ethi uhlupho lonke lwaqala ngoLwesihlanu.
“Ngakhuluma laye esesibhedlela wangithembisa ukuthi uzakube elami ngelanga lomtshado.
“Ngamangala ngimfonela ekuseni engadobhi ifoni kodwa angizange ngicabangele okubi ngoba umkhuhlane ubungamqinelanga kangako sasikhangelele ukuthi odokotela bazamkhipha esibhedlela ekuseni ngelanga lomtshado.
“Kwaba buhlungu sengifonelwa ngitshelwa ukuthi umakoti ngeke abuye emtshadweni ngoba useswelekile,” kutsho uFana.
Uqhubekele phambili wathi wakhala ngoba inhliziyo yakhe idabukile kodwa wazinika isibindi wacela umfundisi ukuthi abatshadise yiloba umkakhe wayesefile.
Indodakazi yabo endala, uSamukelisiwe Maphumulo (23) uthe ulahlekelwe ngumama olothando.
“Wayekhuthele njalo esikhuthaza ukuthi sisebenze ngamandla sikhathi sonke. Angikukholwa lalamuhla ukuthi kasekho emhlabeni.”
UMfanufikile Mhlongo umngane kaFana uthe uNana loFana babengatshada kudala nje yikuthi imali yayingahlangani.
“Ufana wasebenza nzima edinga imali yokwenza umtshado wabo. Wayegezisa imota zabantu aphinde atshayele ithekisi.
“Sonke besithokoza ukuthi ilanga labo lomtshado selifikile kodwa siyethukile sisizwa indaba yokwedlula emhlabeni kukaNana. Impilo le inzima bakithi,” kuphetha uMhlongo. — Ubulembu
Online Reporter