admin
Thokozile Mbedzi
KULAMADODA esigabeni seMbamba line eTsholotsho amangalise uzulu ngemva kokuthelela enye indoda bayitshaya yaze yafa ngoba ibuze ukuthi i400 Rands yayo ingaphi.
UDoubt Nkomo obeleminyaka engu-29 yokuzalwa kubikwa wathelwa nguMpumelelo Sibanda (25), Cabangani Gumede (30), Nkosana Ndlovu (23) lo Saul Ncube (47) ayenatha labo utshwala bamtshaya ngoba ethe evuka ekuseni wayababuza ukuthi i400 Rands abelayo esikhwameni iyengaphi.
Kubikwa abane laba bamtshaya waze waquleka wathwalelwa esibhedlela lapho afika wedlula khona.
Ekhuluma lentatheli kaMthunywa uMelusi Moyo uthe bobone isimanga.
“Sibone isimanga silapha sethukile ngoba inkemenkeme le yenziwe ngabantu abadala esigabeni sethu.
“Amadoda la ayenatha ndawonye uNkomo uthe eselobuthongo wasuka wayalala ele-R400 esikhwameni.
“Ekuseni ephaphama wananzelela ukuba leyomali kaselayo wabuyela koSibanda lapho ababenathela khona wathola abane laba ayenatha labo belokhu bekhona wababuza ukuba ucatshelwe yimali yakhe esikhwameni,” kulandisa uMnu Moyo.
“Amadoda la ahle amsusela amanqe amtshaya waze waquleka esola ukuthi kungani ebuze imali yakhe. Kwaze kwanceda omunye umakhelwane owathi edlula wambona ethe daca phansi equlekile wasesiyabiza uyise bamthwala ngenqola bamusa esibhedlela seTsholotsho bafika bamdlulisela eMpilo lapho adlulela khona,” kulandisa uMnu Moyo.
Imizamo yokukhuluma lesikhulumi samapholisa esabelweni seMatabeleland North uAssitant Inspector Namatirai Mashona yehlule.
Online Reporter