admin
UKAPUTENI weqembu lamaMighty Warriors uFelistas “Figo” Muzongodi ubika ukuba akulaqembu abalesabayo abazadibana lalo kumncintiswano weAfrica Women Cup of Nations, AWCON ngempelaviki ezweni leCameroon.
IZimbabwe ngenye yamazwe aphatheka kulumqhudelwano oqala ngoMgqibelo usiyaphetha mhlaka 23 kulinyanga njalo udibana lamazwe abalisa iGipite, iBotswana, iSouth Africa, Cameroon.
Iphephandaba likazulu lithole ithuba lokuxoxa lokaputeni wesizwe uMuzongodi, odume ngelithi Figo enkundleni zenguqu. Ukaputeni lo uthe bayazi ukuthi babhekane lengcitshi zebhola labesazane, okuyinto abangayitshayi indiva ngoba lamaMighty Warriors ayesatshwa eAfrica.
“Singakhangeli okunengi kulumncintiswano ngaphandle kokuthi sidlalele ukunqoba iAfrica. La yiwo amazwi enkuthazo engiwanikeza abalandeli bethu bonke. Safika eBrazil kumaOlympics kungela muntu osinikeza usekelo lokunqoba ngenxa yokuthi sasingabadlali abangaziwayo.
“Kunkezo yeAfrica le sekuguqukile ngoba amaMighty Warriors sekuliqembu elilodumo. Sibalelwa kumaqembu wonala okuthiwa ayesatshwa,” kutsho uFigo ngoLwesibili amaMighty Warriors epakitshela ukuya eCameroon.
Inkezo yeAfrican Women’s Championship ubaliselwa kuzinga elifana lalelo eleAfcon edlalelwa ngamaqembu abafana.
UFigo uthe ngesikhathi beseBrazil bathola ulwazi ngendlela okumele badlale ngayo kumidlalo enjengale.
“Okwenza ngibelethemba kuqembu lethu yikuthi imidlalo yamaOlympics yasifundisa okunengi. Sesiphambili ngobungcitshi langomqondo wokuncintisa.”
Online Reporter