admin
Thokozile Mbedzi
ZILOKHU zikhakhamele izakhamizi zesigabeni seThabo eBeitbridge ngemva kokuba elinye inina ligongode udadewabo ngesitulo wamtshiya esesimeni esibi ngoMgqibelo.
UEveline Sebata oleminyaka engu-64 yokuzalwa kubikwa utshaye udadewabo uLinet Tlou oleminyaka engu-41 ngesitulo kubangwa abantwana abaxabane bedlala.
Ekhuluma lentatheli kaMthunywa uNkosazana Ruth Siziba uthe lokhe bemangele njengesigaba ukuthi kambe umuntu lodadewabo bebengaze balimazane ngenxa yokulwa kwabantwana.
“Lokhe silesithuli silapha ngoba uLinet loEveline ngumuntu lodadewabo bazalwa ngumama munye. Sikhuluma nje uLinet usesimeni esibi esibhedlela seBeitbridge kulandela ukudluliselwa kwakhe khona evela esibhedlela seZezani.
“Kukhanya abantwababo baxabana uLinet wasesiya emzini kadadewabo Eveline esithi azwizise ukuba abantwana babangani uthe efika esathi uyabuza umntakadadewabo oleminyaka engu-12 kanti yayisiwuchithile umuthi inkonyane.
“Kukhanya uEveline wahle wadobha isitulo walanda umnawakhe uLinet wamtshaya ekhanda lembambo ngesitulo waze wawela phansi. Uthe eselele phansi umntanakhe laye wathatha uswazi watshaya uninomncane enjalo ebubula,” kulandisa uNkszn Siziba.
Kubikwa indaba le yabikelwa amapholisa nanko phela uLinet wayelamanxeba esabekayo ekhanda.
Isikhulumi samapholisa esabelweni seMatabeleland South uInspector Loveness Mangena ebuzwa ngodaba lolu uthe solufikile ehofisini yabo njalo bakhuthaza uzulu ukuba kabaxazulule inkinga nxa kusuke kwaba lengxabano kuhle.
“Uzulu lapho nxa esuke waba lenkinga kaxazulule kuhle inkinga. Kabadinge usizo kubaphathi bezigaba loba amapholisa kulungisiswe kuhle,” kuphetha uInsp Mangena.
Online Reporter